નવી દિલ્હીમાં આગામી 1 નવેમ્બરના રોજ રામલીલા મેદાન ખાતે કથિત ચૂંટણી ગરબડો અને અ નિયમિતતાઓના વિરોધમાં ઈન્ડિયા બ્લોક દ્વારા એક વિશાળ રેલીનું આયોજન કરવામાં આવ્યું છે, જેને કોકરોચ જનતા પાર્ટી એટલે કે સીજેપી દ્વારા સમર્થન આપવામાં આવ્યું છે. આ મામલે નિવેદન આપતા CJPના સંસ્થાપક અભિજીત દીપકે ગંભીર ચિંતા વ્યક્ત કરી છે કે લાયક મતદારોને બાકાત રાખવામાં આવી રહ્યા છે. તેમણે ચૂંટણી પંચ પર પ્રહાર કરતા કહ્યું કે આ સંસ્થા એવા મૂળભૂત લોકશાહી સિદ્ધાંતને નબળો પાડી રહી છે, જે મુજબ નાગરિકોએ સરકાર ચૂંટવાની હોય છે, ન કે સરકારે પોતાના મતદારો નક્કી કરવાના હોય છે.
આ વિરોધ પ્રદર્શન પાછળનું મુખ્ય કારણ મતદાર યાદીના પુનરાવર્તનમાં કથિત ગરબડો હોવાનું સામે આવ્યું છે. બુધવારે દિલ્હીમાં મળેલી બેઠકમાં ઈન્ડિયા બ્લોકના પ્રતિનિધિઓએ એવો આરોપ લગાવ્યો હતો કે આ પ્રક્રિયાથી ગરીબ કામદારો, ભાડૂતો અને અનધિકૃત વસાહતોમાં રહેતા લોકો સૌથી વધુ પ્રભાવિત થયા છે, અને તેમણે તાત્કાલિક ધોરણે લાયક મતદારોના નામ પાછા જોડવાની માંગ કરી છે. વિપક્ષે આ પ્રક્રિયા સામે સવાલો ઉઠાવતા ફરીથી બેલેટ પેપરથી ચૂંટણી યોજવાની માંગ પણ દોહરાવી છે. અભિજીત દીપકે ડૉ. બાબાસાહેબ આંબેડકરના બંધારણ નિર્માણના ઇતિહાસને યાદ કરતા જણાવ્યું હતું કે સાર્વત્રિક પુખ્ત મતાધિકારનો હેતુ જાતિ, ધર્મ કે આર્થિક સ્થિતિને ધ્યાનમાં લીધા વગર દેશના ભવિષ્યમાં દરેક નાગરિકને સમાન ભાગીદારી આપવાનો હતો.
સીજેપીના આ સમર્થનથી આગામી 1 નવેમ્બરની રેલી પહેલા રાજકીય ગરમાવો વધુ તેજ બની ગયો છે. વિપક્ષી પક્ષોનું માનવું છે કે વર્તમાન સ્થિતિમાં યોગ્ય અને નિષ્પક્ષ ચૂંટણી કરાવવાનો ભરોસો ઘટી રહ્યો છે, જેના કારણે સાચા મતદારો મતદાનના અધિકારથી વંચિત રહેવાનું જોખમ ઊભું થયું છે. આ રેલી દ્વારા વિપક્ષ સરકાર અને ચૂંટણી પંચ પર દબાણ વધારવા માંગે છે કે જેથી નાગરિકોના મતાધિકારનું રક્ષણ થઈ શકે અને લોકશાહીની મર્યાદા જળવાઈ રહે. આ મામલે આગામી દિવસોમાં રાજકીય પક્ષો વચ્ચેનો ઘમાસાણ વધુ તેજ બને તેવી પૂરી સંભાવના છે.
