અમેરિકાના કેલિફોર્નિયામાંથી બાળકોની સુરક્ષા અને સરકારી જવાબદારીને લઈને એક મોટા સમાચાર સામે આવ્યા છે. K.S. નામના એક યુવકે બાળપણમાં ફોસ્ટર કેર સિસ્ટમમાં રહેતી વખતે પોતાના પર થયેલા અત્યાચાર સામે લાંબી કાનૂની લડત લડી છે. વર્ષ 2006માં જ્યારે તે માત્ર 12 વર્ષનો હતો, ત્યારે તેણે ગ્રુપ હોમમાં પોતાની સાથે થયેલી ગંભીર ઘટના અંગે ફરિયાદ કરી હોવા છતાં કોઈ જ તપાસ કે પગલાં લેવામાં આવ્યા નહોતા. આ મામલે નીચલી કોર્ટે કેસ ફગાવી દીધો હતો, પરંતુ હવે કેલિફોર્નિયા કોર્ટ ઓફ અપીલ દ્વારા 26 ઓક્ટોબર 2026ના રોજ આ કેસને ફરીથી જીવંત કરીને આગળ વધારવાનો ઐતિહાસિક આદેશ આપવામાં આવ્યો છે.
આ કેસની વિગતો અનુસાર, પીડિત યુવક 2006થી 2007 દરમિયાન જ્યારે 12 થી 13 વર્ષની ઉંમરનો હતો, ત્યારે તેની સાથે સ્ટાફના એક સભ્ય દ્વારા યૌન ઉત્પીડન કરવામાં આવ્યું હતું. યુવકનો આરોપ છે કે તેણે આ અંગે સુપરવાઈઝરને જાણ કરી હતી, પરંતુ પ્રશાસને ઊલટાનું તેને જ સજા આપી હતી અને મેડિકમેશન વધારીને તથા અલગ રૂમમાં રાખીને આરોપી માટે રસ્તો સરળ કરી આપ્યો હતો. વર્ષ 2022માં યુવકે અલામેડા કાઉન્ટી વિરુદ્ધ નેગ્લિજન્સનો લોસૂટ દાખલ કર્યો હતો, જેમાં ગ્રુપ હોમનું અયોગ્ય સુપરવિઝન, સ્ટાફની તાલીમનો અભાવ અને બાળ સુરક્ષાના નિયમોના પાલનમાં નિષ્ફળતા જેવા ગંભીર આરોપો મૂકવામાં આવ્યા હતા. કાઉન્ટી દ્વારા સરકારી ઇમ્યુનિટીનો દાવો કરીને આ કેસને રદ કરવાની માંગ કરવામાં આવી હતી, જેને ટ્રાયલ કોર્ટે સ્વીકારી લીધી હતી.
હાલની અપીલ કોર્ટના ચુકાદાથી કેસમાં નવો વળાંક આવ્યો છે. કોર્ટે સ્પષ્ટ કર્યું છે કે સરકારી નીતિગત નિર્ણયો અને રોજિંદા સુપરવિઝનમાં ફરજ પ્રત્યેની બેદરકારી વચ્ચે મોટો તફાવત છે અને તમામ મામલાઓમાં ઇમ્યુનિટી લાગુ ન પડી શકે. કોર્ટે નીચલી કોર્ટના નિર્ણયને પલટી નાખ્યો છે, જેનો અર્થ એ થયો કે હવે આ સમગ્ર મામલાની ઊંડાણપૂર્વક તપાસ થશે અને તથ્યો બહાર આવશે. જોકે આ ચુકાદો હજુ સુધી કાઉન્ટીની જવાબદારી નક્કી નથી કરતો, પરંતુ પીડિત યુવકને વર્ષો પછી ન્યાય મેળવવાની દિશામાં લડાઈ લડવા માટે એક મોટું કાનૂની પ્લેટફોર્મ મળી ગયું છે.
