અમેરિકાની ટેક્સ કોર્ટે જ્યોર્જિયા સ્થિત લોન્ટ્રાક એન્ટરપ્રાઈઝિસ, એલએલસી નામના પાર્ટનરશિપ ફોર્મ દ્વારા ટેનેસીની જમીન પર કરવામાં આવેલા તોતિંગ ટેક્સ ડિડક્શનના દાવા પર મોટો આંચકો આપ્યો છે. આ કંપનીએ કન્ઝર્વેશન ઇઝમેન્ટ એટલે કે પર્યાવરણીય જાળવણીના નામે 7.45 કરોડ ડોલરના ટેક્સ ડિડક્શનનો દાવો કર્યો હતો, પરંતુ કોર્ટે સ્પષ્ટ કર્યું કે તે જમીનની વાસ્તવિક બજાર કિંમત માત્ર 5 લાખ ડોલર જ હતી. કોર્ટના ચીફ જજ ડેવિડ ઉર્ડાએ પોતાના લેખિત આદેશમાં જણાવ્યું હતું કે કંપનીએ બતાવેલી આ કિંમતનો વાસ્તવિક આર્થિક વાસ્તવિકતા સાથે કોઈ સંબંધ જ નથી. આ સાથે જ કોર્ટે આઈઆરએસ દ્વારા જમીનની ખોટી અને અતિશયોક્તિભરેલી કિંમત બતાવવા બદલ લાદવામાં આવેલો ફરજિયાત 40 ટકા દંડ પણ માન્ય રાખ્યો છે.
આ સમગ્ર વિવાદ ટેનેસીના ગ્રુંડી કાઉન્ટીમાં આવેલા 310 એકર જમીનના ટુકડા સાથે જોડાયેલો છે. કોર્ટના રેકોર્ડ મુજબ ટોમી અને એવલિન ડિલાર્ડ નામના દંપતીએ આ જમીન 2006માં 13 લાખ ડોલરમાં ખરીદી હતી અને વર્ષો સુધી તેને વેચવા માટે મૂકવા છતાં 29 લાખ ડોલરની કિંમતે પણ કોઈ ખરીદદાર મળ્યો ન હતો. બાદમાં આ જમીનને સિન્ડિકેટેડ કન્ઝર્વેશન ઇઝમેન્ટ ડીલમાં સામેલ કરવામાં આવી અને લોન્ટ્રાક કંપનીએ તેમાં રસ દાખવ્યો હતો. ડિસેમ્બર 2014માં કંપનીએ આશરે 288.8 એકર જમીન ફૂટહિલ્સ લેન્ડ કન્ઝર્વેન્સીને સોંપી દીધી અને રોકાણકારોને મોટા ટેક્સ બેનિફિટ્સની લાલચ આપીને આશરે 8.8 મિલિયન ડોલરમાં 95 ટકા હિસ્સો ઓફર કર્યો. કંપનીએ પોતાના ફેડરલ ટેક્સ રિટર્નમાં દાવો કર્યો હતો કે આ જમીનનો શ્રેષ્ઠ ઉપયોગ કોમર્શિયલ લાઈમસ્ટોન માઈન એટલે કે ચૂનાના પથ્થરની ખાણ તરીકે થઈ શકે છે અને તે આધારે 7.45 કરોડ ડોલરનું ચેરિટેબલ કન્ટ્રિબ્યુશન ડિડક્શન માગ્યું હતું.
ચીફ જજ ડેવિડ ઉર્ડાએ કંપનીના આ દાવાઓની સખત આલોચના કરતા જણાવ્યું કે માઈનિંગ પ્લાન માત્ર કલ્પનાશીલ અને ટેક્સ બચાવવા માટેનો બનાવટી રસ્તો હતો, કારણ કે ત્યાં કોઈ એન્જિનિયરિંગ સ્ટડી કે ઝોનિંગ મંજૂરી લેવામાં આવી ન હતી. કોર્ટે કંપનીના એક્સપર્ટ્સના રિપોર્ટને ફગાવીને આઈઆરએસના એક્સપર્ટ્સની પદ્ધતિ અપનાવી હતી, જેમાં સમાન જમીનોના વેચાણના આધારે સાચી કિંમત 5 લાખ ડોલર નક્કી કરવામાં આવી હતી. કાયદા મુજબ સાચી કિંમત કરતા 200 ટકા કે તેથી વધુ ખોટી કિંમત દર્શાવવા પર ગ્રોસ વેલ્યુએશન મિસસ્ટેટમેન્ટ લાગુ પડે છે અને આવા કિસ્સામાં પ્રોફેશનલ એપ્રેઝરની સલાહ લીધી હોય તો પણ રાહત મળતી નથી. આ ચુકાદો એવા તમામ રોકાણકારો અને ઓર્ગેનાઈઝર્સ માટે લાલબત્તી સમાન છે જેઓ ગ્રામીણ જમીનો ખરીદીને વિકાસ પર પ્રતિબંધ મૂકે છે અને ફુલાવેલા રિપોર્ટ્સના આધારે તોતિંગ ટેક્સ રાઈટ-ઓફ મેળવે છે.
