ગુજરાતમાં સરકારી કચેરીઓમાં પ્રજાના કામો કઢાવવા માટે ચાલતી લાંચ-રૂશ્વતની બદી સામે એન્ટી કરપ્શન બ્યુરો દ્વારા કડક કાર્યવાહી કરવામાં આવી રહી છે. તાજેતરમાં એસીબીની સક્રિય ટીમોએ રાજ્યના અલગ-અલગ શહેરોમાં સફળ ટ્રેપ ગોઠવીને ભ્રષ્ટ કર્મચારીઓ અને વચેટિયાઓને લાંચની રકમ સાથે રંગેહાથ ઝડપી પાડ્યા છે. ભાવનગર, અમરેલી અને અમદાવાદમાં બનેલી આ ઘટનાઓએ સરકારી બેડામાં ભારે હડકંપ મચી ગયો છે, જ્યાં સામાન્ય નાગરિકો અને કર્મચારીઓ પાસેથી નાના-મોટા કામ માટે બેફામ લાંચ માંગવામાં આવતી હતી.
પ્રથમ કેસમાં ભાવનગરના શામપરા સિદસર ગામના એક ખેડૂતની જમીન બિનખેતી કરવા માટે 'બાડા' કચેરીના આઉટસોર્સિંગ પ્લાનિંગ આસિસ્ટન્ટ મિતુલ જગદીશભાઈ પાનસીણિયાએ રૂ. 15 લાખની લાંચ માંગી હતી અને રૂ. 12 લાખમાં સોદો નક્કી થયો હતો. એસીબીની ટીમે સિહોર તાબાના ટાણા ચોકડી પાસે છટકું ગોઠવીને તેને રૂ. 9 લાખનો પહેલો હપ્તો લેતા ઝડપી લીધો હતો. બીજા કેસમાં અમરેલીના બહુમાળી ભવન સ્થિત ઇરીગેશન કચેરીમાં બાકી બિલ અને ટેસ્ટિંગના બિલ મંજૂર કરવાના બદલામાં જુનિયર ક્લાર્ક રાકેશ વિનોદરાય ભટ્ટે રૂ. 51,000 ની લાંચ માંગી હતી, જે રકમ પટ્ટાવાળા જયદીપ ચતુરભાઈ હરિયાણી મારફતે સ્વીકારવામાં આવતા એસીબીએ બંનેને દબોચી લીધા હતા. ત્રીજા કેસમાં અમદાવાદના રખિયાલ-ગોમતીપુર ઇ-ડિવિઝન હોમગાર્ડ યુનિટમાં ટ્રાફિક ડ્યુટી ફાળવવા માટે માસિક રૂ. 1,000 ના હપ્તાની માંગણી કરનાર હોમગાર્ડ ડિવીઝન કમાન્ડર વિજયભાઈ બી. જાદવ, કમ્પ્યુટર ઓપરેટર પંકજભાઈ પરમાર તેમજ હોમગાર્ડ જવાનો હર્ષમય જશવંતભાઈ સૂર્યવંશી અને તુષાર હસમુખ લેઉવા સામે ગુનો નોંધીને બે આરોપીઓને લાંચના નાણાં સાથે પકડી લેવામાં આવ્યા છે.
આ ત્રણેય બનાવો સાબિત કરે છે કે સરકારી બાબુઓ સામાન્ય પ્રજાને હેરાન કરવામાં કોઈ કસર છોડતા નથી. જો કે, એન્ટી કરપ્શન બ્યુરોની સતર્કતા અને જાગૃત નાગરિકોની હિંમતના કારણે આ ભ્રષ્ટ કર્મચારીઓ પોતાના મનસૂબામાં સફળ થવાને બદલે કાયદાના સળિયા પાછળ પહોંચી ગયા છે. એસીબીની આ સામુહિક અને આક્રમક કાર્યવાહીથી ભ્રષ્ટ કર્મચારીઓમાં મોટો ફફડાટ ફેલાઈ ગયો છે અને આગામી દિવસોમાં પણ આ પ્રકારની ડ્રાઇવ ચાલુ રહેવાની સંભાવના છે.
