બુધવારે કર્નાટક સરકારે લેજિસ્લેટિવ કાઉન્સિલની ચૂંટણીના પરિણામો બાદ પોતાની પ્રતિક્રિયા આપી છે. હોમ મિનિસ્ટર પ્રિયંક ખડગેએ પત્રકારો સાથે વાતચીતમાં સ્વીકાર્યું કે પાર્ટી તમામ 4 બેઠકો હારી ગઈ છે અને કોંગ્રેસ આ મામલે આત્મનિરીક્ષણ કરશે. તેમણે કહ્યું કે લોકશાહીમાં જનતાના નિર્ણયને માન આપવું પડે છે અને દરેક ચૂંટણી એક વેક-અપ કૉલ સમાન હોય છે. જો કે, તેમણે ભારપૂર્વક જણાવ્યું કે આ પરિણામો રાજ્ય સરકારની કામગીરીનું પ્રતિબિંબ નથી, કારણ કે આ ચૂંટણીઓમાં શિક્ષકો અને સ્નાતકો જેવા મર્યાદિત વ્યાવસાયિક મતદારો સામેલ હતા.
ચૂંટણીના આંકડાકીય સમીકરણો પર નજર કરીએ તો, બેંગલુરુ ટીચર્સ કન્સિટ્યુન્સીમાં જેડીએસના ઉમેદવાર એ. પી. રંગાનાથે કોંગ્રેસના સીટીંગ MLC પુત્તન્નાને 908 મતોથી હરાવ્યા હતા. જ્યારે નોર્થ-ઈસ્ટ ટીચર્સ સીટ પર ભાજપના શશિલ જી. નામોશીએ કોંગ્રેસના શરણપ્પા મત્તુરને 3,297 મતોથી હરાવીને બેઠક જાળવી રાખી હતી. સાઉથ-ઈસ્ટ ગ્રેજ્યુએટ્સ કન્સિટ્યુન્સીમાં ભાજપના કે. એમ. સુરેશે કોંગ્રેસના શશી હુલિકુંટે મુટ્ટ સામે 23,098 મતોથી તો વેસ્ટ ગ્રેજ્યુએટ્સ સીટ પર ભાજપના એસ. વી. સંકાનુરે કોંગ્રેસના મોહન લિંબિકાઈ સામે 9,323 મતોથી ભવ્ય જીત મેળવી હતી. ભાજપના પ્રદેશ અધ્યક્ષ બી. વાય. વિજયેન્દ્રના નિવેદનનો જવાબ આપતા પ્રિયંક ખડગેએ દાવો કર્યો હતો કે કોંગ્રેસ 2028ની એસેમ્બલી ચૂંટણીમાં ડી. કે. શિવકુમાર, સિદ્ધારમૈયા, જી. પરમેશ્વરા અને મલ્લિકાર્જુન ખડગેના નેતૃત્વમાં મજબૂતીથી સત્તામાં વાપસી કરશે.
આ દરમિયાન પ્રિયંક ખડગેએ ઈલેક્ટોરલ રોલ્સમાં ગેરરીતિ અને સ્પેશિયલ ઈન્ટેન્સિવ રિવિઝન (SIR) મુદ્દે પણ સવાલો ઉઠાવ્યા હતા અને ચિટાપુર તથા આલંદમાં ફોર્મ-7 અરજીઓમાં મોટા પાયે ગરબડ થઈ હોવાનો આક્ષેપ કર્યો હતો. તેમણે EVM સામે સવાલો ઉઠાવતા ઈલેક્શન કમિશનને પ્રક્રિયા પારદર્શક બનાવવા અપીલ કરી હતી. બેંગલુરુમાં પ્રોટેસ્ટ સાઈટ્સના પ્રસ્તાવ અંગે વાત કરતા તેમણે કહ્યું કે સરકાર નાગરિકોના વિરોધ પ્રદર્શનના અધિકાર અને અન્ય સામાન્ય નાગરિકોના હકો વચ્ચે સંતુલન જાળવી રહી છે.
