સ્પેનના મધ્ય ભાગમાં આવેલા ટોલેડો પ્રોવિન્સમાં બુધવારે સવારે એક મોટો અને ગંભીર રેલ અકસ્માત સર્જાયો હતો. મેડ્રિડ-સેવિલ રૂટ પર જઈ રહેલી એક AVE ટ્રેન અને એક Iryo ટ્રેન વચ્ચે ધડાકાભેર અથડામણ થતા હાહાકાર મચી ગયો હતો. આ ભયાનક દુર્ઘટનામાં ઓછામાં ઓછા 30 લોકોના મોત થયાની પુષ્ટિ થઈ છે, જ્યારે અનેક લોકો ઘાયલ થયા છે. અકસ્માત એટલો જોરદાર હતો કે ટ્રેનના કેટલાક ડબ્બા પાટા પરથી નીચે ખાડીમાં ગબડી પડ્યા હતા. ઘટનાની જાણ થતાં જ ઇમરજન્સી સર્વિસ અને રેસ્ક્યુ ટીમો તાત્કાલિક ઘટનાસ્થળે દોડી આવી હતી અને યુદ્ધના ધોરણે રાહત તથા બચાવ કામગીરી શરૂ કરી દીધી હતી.
પ્રાથમિક તપાસ અને સરકારી સૂત્રોના જણાવ્યા અનુસાર, મુખ્ય સિગ્નલિંગ સિસ્ટમમાં ખામી સર્જાવાના કારણે ઓટોમેટિક સેફ્ટી સિસ્ટમ બંધ થઈ ગઈ હતી અને ટ્રેનોનું સંચાલન મેન્યુઅલ મોડ પર શિફ્ટ કરવું પડ્યું હતું. એડિફ ઓપરેટર દ્વારા મેન્યુઅલ કંટ્રોલ દરમિયાન થયેલી માનવીય ભૂલ આ અકસ્માતનું સંભવિત કારણ હોવાનું મનાઈ રહ્યું છે. આ અકસ્માતમાં Iryo ટ્રેનમાં 146 પેસેન્જર્સ અને 1 બેબી સવાર હતા, જ્યારે AVE ટ્રેનમાં 397 લોકો મુસાફરી કરી રહ્યા હતા. મુસાફરોના જણાવ્યા અનુસાર મુસાફરી શરૂ થયાના લગભગ 40 મિનિટ પછી કિલોમીટર માર્કર 118 પાસે મોરા, ઓર્ગેઝ અને ઉર્ડા વચ્ચે આ જોરદાર ટક્કર થઈ હતી, જેમાં એક ટ્રેન રૂટ પર ઊભેલી હોવાનું પણ સામે આવ્યું છે.
આ ગંભીર દુર્ઘટનાને પગલે પ્રાઇમ મિનિસ્ટર પેડ્રો સાંચેઝે ઊંડા દુઃખની લાગણી વ્યક્ત કરી પીડિતો અને તેમના પરિવારો પ્રત્યે સંવેદના પાઠવી છે. સુરક્ષાના ભાગરૂપે મેડ્રિડને સિયુદાદ રિયલ અને અંડાલુસિયા સાથે જોડતી રેલ સેવાઓ તાત્કાલિક અસરથી સસ્પેન્ડ કરી દેવામાં આવી છે. ઉલ્લેખનીય છે કે સ્પેનમાં થોડા જ મહિનાઓમાં આ બીજી મોટી રેલ દુર્ઘટના સર્જાઈ છે, જેના કારણે દેશના રેલવે નેટવર્કની સુરક્ષા સામે ફરી એકવાર ગંભીર સવાલો ઊભા થયા છે. હાલ ઇન્વેસ્ટિગેશન ટીમો સમગ્ર ઘટનાક્રમની ઝીણવટભરી તપાસ કરી રહી છે અને મૃત્યુઆંક વધવાની દહેશત વચ્ચે રેસ્ક્યુ ઓપરેશન હજુ પણ ચાલુ છે.
