વડોદરાના BCA સ્ટેડિયમ ખાતે રમાયેલી ત્રીજી વનડેમાં ભારતીય મહિલા ક્રિકેટ ટીમની યુવા સ્પિનર વૈષ્ણવી શર્માએ પોતાના ઘાતક પ્રદર્શનથી બધાના દિલ જીતી લીધા છે. માત્ર 20 વર્ષની ઉંમરે ડાબા હાથની આ સ્પિનરે પોતાની સચોટ લાઇન અને લેન્થથી વિરોધી ટીમની બેટિંગ લાઇનઅપને વેરવિખેર કરી નાખી હતી. ઝિમ્બાબ્વે સામેની આ શ્રેણીમાં વૈષ્ણવીનું ફોર્મ અદ્ભુત ચાલી રહ્યું છે અને અગાઉની મેચમાં પણ તેણે ચાર વિકેટ ઝડપી હતી, પરંતુ આ મેચમાં તેણે એક પગલું આગળ વધીને પોતાની કારકિર્દીનું સર્વશ્રેષ્ઠ પ્રદર્શન કર્યું છે.
મેચની વાત કરીએ તો વૈષ્ણવી શર્માએ શિસ્તબદ્ધ બોલિંગ કરતા માત્ર 10 ઓવરમાં 39 રન આપીને ઝિમ્બાબ્વેની અડધી ટીમને એકલા હાથે પોવેલિયન ભેગી કરી દીધી હતી. તેણે મેચ દરમિયાન નિયમિત અંતરે વિકેટો ઝડપી હતી, જેમાં બેવ્ડ બીઝા, મુબાચિકવા, ધુરુરુ, માવુંગા અને ગ્વાનઝુરા જેવી બેટરોનો શિકાર કરીને તેણે પોતાની આંતરરાષ્ટ્રીય કારકિર્દીમાં પહેલીવાર 5 વિકેટ લેવાની સિદ્ધિ હાંસલ કરી હતી. તેના આ ઘાતક મારાને કારણે જ ઝિમ્બાબ્વેની પૂરી ટીમ 39.5 ઓવરમાં માત્ર 131 રનના સામાન્ય સ્કોર પર ઓલઆઉટ થઈ ગઈ હતી.
આ શાનદાર પ્રદર્શન બાદ હવે ટીમ ઇન્ડિયા પાસે આખી વનડે શ્રેણીમાં ક્લીન સ્વીપ કરવાની પૂરી તક છે, કારણ કે ભારતે આ પહેલાની બંને વનડે મેચો પણ જીતી લીધી છે. ભારતે આ અગાઉ પહેલી વનડે 9 વિકેટથી અને બીજી વનડે 121 રનના મોટા અંતરથી પોતાના નામે કરી હતી, એટલું જ નહીં પરંતુ આ પ્રવાસમાં અગાઉ રમાયેલી T20 શ્રેણી પણ ભારતે જીતી લીધી હતી. હવે આ સરળ લક્ષ્યને પાર કરીને ટીમ ઇન્ડિયા વધુ એક શાનદાર સિરીઝ જીતવા તરફ મજબૂત રીતે આગળ વધી રહી છે.
