શનિવારની રાત્રે જામનગર જિલ્લાના કાલાવડ શહેરમાં એક સામાન્ય બાબતે મામલો એટલો બગડ્યો કે વાત લોહીયાળ જંગ સુધી પહોંચી ગઈ. રાત્રે અંદાજે 10 વાગ્યાના અરસામાં કાલાવડના ખાટકીવાડ વિસ્તારમાં રહેતા અમીનભાઈ હુસેનભાઇ ચૌહાણ પોતાની દુકાન બંધ કરીને મોટરસાયકલ પર સવાર થઈને પોતાના ઘરે જવા માટે નીકળ્યા હતા. આ દરમિયાન રસ્તામાં કાલાવડના જ ખત્રીવાડમાં રહેતા યુસુફ ઉર્ફે બદરૂ નુરૂદ્દીન ચુનિયા નામના શખ્સે પોતાનું એક્ટિવા ખૂબ જ પૂરપાટ અને ફુલ સ્પીડમાં હંકારીને પસાર થઈ રહ્યો હતો, જેને જોઈને અમીનભાઈએ તેને વાહન થોડું ધીમે ચલાવવાની સાદી સલાહ આપી હતી.
આ મામલે અમીનભાઈની સાદી ટકોર પેલો એક્ટિવાચાલક સહન કરી શક્યો નહીં અને બદરૂએ ઉશ્કેરાઈને અમીનભાઈને જાહેરમાં ગાળો ભાંડી હતી. અમીનભાઈએ તેને ગાળો બોલવાની ના પાડતા મામલો વધુ ઉગ્ર બન્યો હતો અને આવેશમાં આવેલા આ શખ્સે પોતાની સાથે રાખેલી છરી કાઢીને અમીનભાઈ પર સીધો હુમલો કરી દીધો હતો. આ ઝપાઝપી અને હુમલા દરમિયાન ત્યાં હાજર શાહરૂખ નામનો અન્ય એક યુવાન અમીનભાઈને બચાવવા માટે વચ્ચે પડ્યો હતો, પરંતુ ગુસ્સામાંાંધ થયેલા આરોપીએ તે યુવાનને પણ છોડ્યો ન હતો અને તેના પર પણ હુમલો કરીને ગંભીર ઇજાઓ પહોંચાડી હતી.
આ અચાનક થયેલા હુમલાને કારણે બંને યુવકો ગંભીર રીતે લોહીલુહાણ બની ગયા હતા, જેને પગલે તાત્કાલિક ધોરણે બંને ઇજાગ્રસ્ત યુવકોને સારવાર માટે હોસ્પિટલ ખસેડવામાં આવ્યા હતા. આ ઘટના બાદ ભોગ બનનાર અમીનભાઇએ હિંમત દાખવીને સ્થાનિક પોલીસ સ્ટેશનમાં પહોંચીને આરોપી યુસુફ ઉર્ફે બદરૂ વિરુદ્ધ સત્તાવાર ફરિયાદ નોંધાવી છે. પોલીસે ફરિયાદના આધારે આગળની તપાસ શરૂ કરી છે અને આરોપીને ઝડપી પાડવા માટેના ચક્રો ગતિમાન કર્યા છે.
