મંગળવારે બપોરે આશરે 4:30 વાગ્યે વ્હાઇટફિલ્ડ રૂટ પર દોડતી બેંગલુરુ મેટ્રો ટ્રેનમાં મુસાફરી કરી રહેલી સૌપિકા નામની યુવતી સાથે એક શરમજનક ઘટના બની હતી. યુવતીએ સોશિયલ મીડિયા પર વીડિયો શેર કરીને જણાવ્યું હતું કે એક સાથી મુસાફરે તેનો ગુપ્ત રીતે વીડિયો રેકોર્ડ કર્યો હતો. આ ઘટના બન્યા બાદ યુવતી ધ્રૂજવા લાગી હતી પરંતુ હિમ્મત દાખવીને તેણે તુરંત જ તે શખ્સનો વિરોધ કર્યો હતો અને તેને રંગેહાથ ઝડપી લીધો હતો. યુવતીએ સ્પષ્ટતા કરી હતી કે તેણે પૂરા કપડાં પહેર્યા હોવા છતાં આ હરકત કરવામાં આવી હતી, જે દર્શાવે છે કે પહેરવેશ સામે સવાલ ઉઠાવનારાઓ માટે આ એક તમાચો છે.
ઘટના બન્યાની સાથે જ મેટ્રો ટ્રેનની અંદર જ યુવતીએ પેલા શખ્સને ઘેરી લીધો હતો અને વારંવાર પૂછ્યું હતું કે તે શા માટે તેનો વીડિયો બનાવી રહ્યો હતો. યુવતીએ તેનો ફોન અનલોક કરીને બતાવવાની માંગણી કરી હતી અને મેટ્રો સુરક્ષા કર્મચારીઓને પણ ઘટનાસ્થળે બોલાવી લીધા હતા. ટ્રેન થોભ્યા બાદ અને લિફ્ટની આસપાસ પણ બંને વચ્ચે બોલાચાલી થઈ હતી જેમાં પેલા શખ્સે પહેલાં માફી માગી હતી અને પછી રેકોર્ડિંગ કરવાથી ઇન્કાર કર્યો હતો. આ દરમિયાન મેટ્રો સુરક્ષાકર્મીઓ સમક્ષ જ પેલો શખ્સ ફોન યુવતીના હાથમાંથી આંચકીને અને પરત લઈને સ્થળ પરથી નાસી છૂટવામાં સફળ રહ્યો હતો.
આ આખો વીડિયો સોશિયલ મીડિયા પર વાયરલ થતાં જ બેંગલુરુ સિટી પોલીસ હરકતમાં આવી હતી અને યુવતીની પોસ્ટ પર પ્રતિક્રિયા આપીને વિગતો મંગાવી હતી. પોલીસે આ મામલે કડક રૂપે એફઆઈઆર નોંધી લીધી છે અને આરોપીને પકડવા માટે તપાસના ચક્રો ગતિમાન કર્યા છે. યુવતીએ મેટ્રો સ્ટેશન પર પણ ઓફિશિયલ ફરિયાદ નોંધાવી હતી જ્યાં તેને 7 દિવસમાં ફોલોઅપ મળવાનું આશ્વાસન આપવામાં આવ્યું હતું. આ ઘટના બાદ મેટ્રોમાં મહિલાઓની સુરક્ષાને લઈને ફરી એકવાર ગંભીર સવાલો ઊભા થયા છે અને લોકો આરોપી સામે સખત કાર્યવાહીની માગ કરી રહ્યા છે.
