દેશમાં વધી રહેલી આર્થિક અસમાનતાને લઈને કોંગ્રેસે મોદી સરકાર પર આકરા પ્રહાર કર્યા છે અને તેને દેશના સૌથી ગંભીર ચિંતાનો વિષય ગણાવ્યો છે. વિપક્ષી પાર્ટીએ બુધવારે માંગ કરી હતી કે સરકારે આર્થિક મુશ્કેલીઓની વાસ્તવિકતા સ્વીકારવી જોઈએ, એમ્પ્લોયમેન્ટની તકો વધારવી જોઈએ અને મોંઘવારી પર કાબૂ મેળવવા માટે નક્કર કદમ ઉઠાવવા જોઈએ. કોંગ્રેસના નેતાઓએ સોશિયલ મીડિયા પર આક્ષેપ કર્યો હતો કે સરકાર વિકાસના દાવા કરવા માટે આંકડાઓમાં હેરફેર કરી રહી છે, પરંતુ હકીકતમાં સામાન્ય જનતા સુધી આ વિકાસનો લાભ પહોંચી રહ્યો નથી.
કોંગ્રેસના જનરલ સેક્રેટરી જયરામ રમેશે એક મીડિયા રિપોર્ટ શેર કરતા જણાવ્યું હતું કે નાણાકીય વર્ષ 2025-26માં કૌટુંબિક બચતમાં ઘટાડો થયો છે અને સામે પક્ષે તેમનું નવું દેવું ખૂબ ઝડપથી વધી ગયું છે. આ આંકડાઓ મુજબ ગત વર્ષના 22.57 લાખ કરોડ રૂપિયાની સરખામણીએ આ વર્ષે નેટ હાઉસહોલ્ડ ફાઈનાન્શિયલ સેવિંગ્સ ઘટીને આશરે 21.69 લાખ કરોડ રૂપિયા થઈ ગઈ છે. રમેશે કટાક્ષ કર્યો હતો કે વધતી મોંઘવારી, વધતું કરજ અને ઘટતી કમાણી એ જ મોદી સરકારમાં મધ્યમ વર્ગના ભાગે આવ્યું છે. તેમણે ઉમેર્યું કે આજના સમયમાં યુવાનો બેરોજગારીનો ભોગ બની રહ્યા છે અને કંપનીઓમાં હાયરિંગ પણ ઘટી રહ્યું છે.
આર્થિક તંગીના આ માહોલમાં મધ્યમ વર્ગ અને સામાન્ય પરિવારોએ ઘર ચલાવવા માટે પોતાની બચત તોડવી પડી રહી છે અને દૈનિક ખર્ચાઓ માટે પણ લોન લેવાની ફરજ પડી રહી છે. એક તરફ ઉદ્યોગો અને અમીરોનો નફો વધી રહ્યો છે, તો બીજી તરફ મધ્યમ વર્ગ બજેટ સંભાળવામાં સંઘર્ષ કરી રહ્યો છે. કોંગ્રેસે સ્પષ્ટ શબ્દોમાં ચેતવણી આપી છે કે જીડીપીના આંકડાઓથી વાસ્તવિકતા છુપાવી શકાતી નથી, કારણ કે વિકાસના સાચા અર્થ ત્યારે જ સાર્થક બને જ્યારે તેનો લાભ સામાન્ય માનવી સુધી પહોંચે. સરકાર ભલે આ દાવાઓને ફગાવતી હોય, પરંતુ દેશનો મધ્યમ અને ગરીબ વર્ગ પોતાના ભવિષ્યને લઈને ચિંતિત છે.
