વડોદરામાં રમાઈ રહેલી રણજી ટ્રોફી મેચમાં બરોડાના ટોપ ઓર્ડર બેટ્સમેન પ્રિયાંશુ મોલિયાએ પોતાની ખતરનાક બેટિંગથી ક્રિકેટ જગતમાં ધૂમ મચાવી દીધી છે. માત્ર 21 વર્ષની નાની ઉંમરે પ્રિયાંશુએ જમ્મુ અને કાશ્મીર સામે મેદાન પર ઉતરીને અદ્ભુત રમત બતાવી અને કોઈ સામાન્ય ઇનિંગ નહીં પરંતુ સીધી ત્રેવડી સદી ફટકારી દીધી હતી. આ મેચમાં તેણે શાનદાર બેટિંગ કરતા 321 રન બનાવ્યા અને તે અંત સુધી આઉટ થયા વગર અણનમ રહ્યો હતો. તેની આ ઘાતક બેટિંગના દમ પર વડોદરાની ટીમનો સ્કોર 616 રન સુધી પહોંચ્યો હતો અને આ ઇનિંગમાં મહેશ પિઠિયાએ પણ સાથ આપતા શાનદાર સદી ફટકારી હતી.
પ્રિયાંશુની આ સદી માત્ર એક રેકોર્ડ નથી પરંતુ ભારતીય ઘરેલુ ક્રિકેટનો મોટો ઇતિહાસ બની ગઈ છે, કારણ કે છેલ્લા 79 વર્ષમાં રણજી ટ્રોફીમાં વડોદરાના કોઈ પણ બેટ્સમેને ત્રેવડી સદી ફટકારી ન હતી. આ મામલામાં પ્રિયાંશુએ ગુલ મોહમ્મદનો જૂનો રેકોર્ડ તોડી નાખ્યો છે જેમણે વર્ષ 1947માં હોલકર સામે 319 રન બનાવ્યા હતા અને ત્યારથી આ રેકોર્ડ અકબંધ હતો. આ પહેલા વર્ષ 2016માં દીપક હુડ્ડા 293 રન બનાવીને સદી ચૂકી ગયા હતા પરંતુ પ્રિયાંશુએ 1947 પછી વડોદરા તરફથી ત્રેવડી સદી ફટકારનાર પ્રથમ બેટ્સમેન બનવાનું ગૌરવ મેળવ્યું છે. મૂળ રાજકોટમાં 17 જૂન, 2025ના રોજ જન્મેલા પ્રિયાંશુએ અગાઉ અંડર-19 વર્લ્ડ કપ અને વિજય હજારે ટ્રોફીમાં પણ શાનદાર પ્રદર્શન કર્યું છે.
આ શાનદાર સફળતા પાછળ પ્રિયાંશુ અને તેના પરિવારનો વર્ષોનો સંઘર્ષ જોડાયેલો છે, જેમાં તેના પિતા સુરેશ મોલિયાએ પુત્ર માટે હીરાના વ્યવસાયની નોકરી છોડી દીધી હતી. પિતાએ પોતાનું સમગ્ર ધ્યાન પ્રિયાંશુની ક્રિકેટ પ્રેક્ટિસ અને મેચ ટ્રાવેલ પર લગાવી દીધું હતું અને દીકરાને મોટો ખેલાડી બનાવવા માટે રાજકોટથી વડોદરા કાયમી ઘર પણ ખસેડી લીધું હતું. પ્રિયાંશુએ માત્ર 17 વર્ષની ઉંમરે રણજી ડેબ્યૂ કરીને સતત બે સદી ફટકારી હતી અને નારી કોન્ટ્રાક્ટર બાદ આ સિદ્ધિ મેળવનાર તે પહેલો બેટ્સમેન બન્યો હતો. પિતાના આ મોટા બલિદાન અને પોતાના કઠિન પરિશ્રમના જોરે આજે પ્રિયાંશુએ દેશભરમાં પોતાના પરિવાર અને રાજ્યનું નામ રોશન કરી દીધું છે.
