ઉત્તર ગુજરાતના શ્રદ્ધાનું મોટું કેન્દ્ર ગણાતા મહેસાણા જિલ્લાના પ્રખ્યાત બહુચરાજી મંદિરમાં લાંબી રાહ જોયા બાદ આખરે દાનની ગણતરીનો ધમધમાટ શરૂ થઈ ચૂક્યો છે. અંદાજે અઢી વર્ષથી બેંકમાં કે અન્યત્ર જમા ન થવાને કારણે કોથળામાં ભરીને પેક કરાયેલા દાનની રકમનો હિસાબ બહાર આવવાનો છે. માતાજીના ભક્તો દ્વારા શ્રદ્ધાપૂર્વક ચઢાવવામાં આવેલી અઢળક રોકડ અને સોના-ચાંદીના કિંમતી દાગીનાની આ ગણતરી આગામી 6 નવેમ્બર સુધી સઘન સુરક્ષા અને નિયમો વચ્ચે ચાલુ રહેવાની છે.
આ સમગ્ર પ્રક્રિયામાં સંપૂર્ણ પારદર્શિતા જળવાઈ રહે અને કોઈપણ પ્રકારની ગેરરીતિ ન થાય તે માટે વહીવટી તંત્ર દ્વારા અત્યંત કડક પગલાં લેવામાં આવ્યા છે. આ કામ માટે નાયબ કલેક્ટર સહિતના ઉચ્ચ મહેસૂલી અધિકારીઓની ખાસ ટીમો તૈનાત કરવામાં આવી છે. ગણતરીની કામગીરીમાં જોડાનાર કર્મચારીઓ અને ગણતરીદારો માટે વિશેષ આચારસંહિતા બનાવાઈ છે, જે અંતર્ગત તેઓને ખિસ્સાવાળા કપડા અને મોજા પહેરવા પર સખત પ્રતિબંધ ફરમાવવામાં આવ્યો છે જેથી કોઈ અયોગ્ય પ્રવૃત્તિ ન થઈ શકે.
ભંડાર કક્ષની અંદર દાન ગણતરી દરમિયાન કોઈપણ અનિચ્છનીય ઘટના કે ભ્રષ્ટાચારને રોકવા માટે હાઈ-ટેક સુરક્ષા બંદોબસ્ત ગોઠવવામાં આવ્યો છે. ભંડાર કક્ષમાં કોઈ પણ વ્યક્તિ પોતાનો મોબાઈલ ફોન, અંગત રોકડ કે દાગીના સાથે લઈ જઈ શકશે નહીં. આ ઉપરાંત, ગેરરીતિની તમામ શક્યતાઓને નાબૂદ કરવા માટે ગણતરીમાં નિયુક્ત કરાયેલા મહેસૂલી અધિકારીઓની ફરજમાં રોજેરોજ ફેરફાર કરવામાં આવશે અને આખી પ્રક્રિયાનું સીસીટીવી કેમેરા દ્વારા સતત મોનિટરિંગ કરવામાં આવી રહ્યું છે.
