જામનગર પોલીસે દારૂના ગેરકાયદેસર ધંધા સામે કડક કાર્યવાહી કરતા અંદાજે 15,000 કરતા વધુ વિદેશી દારૂની બોટલો ઉપર બુલડોઝર ફેરવી દીધું હતું. પોલીસ દ્વારા નાશ કરવામાં આવેલા આ જથ્થાની બજાર કિંમત આશરે ₹75 લાખ જેટલી આંકવામાં આવી રહી છે. અગાઉ અલગ-અલગ દરોડા દરમિયાન પકડવામાં આવેલો આ લાખો રૂપિયાનો દારૂનો જથ્થો પોલીસ ચોપડે સુરક્ષિત રાખવામાં આવ્યો હતો, જેને હવે જાહેરમાં નષ્ટ કરવાનો નિર્ણય લેવામાં આવ્યો હતો.
તંત્ર દ્વારા કરવામાં આવેલી આ કડક કાર્યવાહીનો મુખ્ય હેતુ બુટલેગરો અને અસામાજિક તત્વોમાં પોલીસનો ખોફ બેસાડવાનો છે. આ નષ્ટ કરાયેલા દારૂના વિઝ્યુઅલ્સ પણ સામે આવ્યા છે, જેમાં સ્પષ્ટ જોઈ શકાય છે કે કેવી રીતે ભારે પોલીસ બંદોબસ્ત વચ્ચે બુલડોઝર ચલાવીને લાખોની કિંમતની બોટલોનો નાશ કરવામાં આવ્યો. જામનગર પોલીસની આ સ્પષ્ટ અને આક્રમક કાર્યવાહીથી ગેરકાયદેસર પ્રવૃત્તિઓ ચલાવનારાઓમાં ભારે ફફડાટ ફેલાઈ ગયો છે.
