ગુજરાતમાં ગાંધીનગર મહાનગર પાલિકાની ચૂંટણી બાદ હવે આગામી વિધાનસભા ચૂંટણીને ધ્યાનમાં રાખીને તમામ રાજકીય પક્ષોએ સંગઠનને મજબૂત કરવાની કવાયત શરૂ કરી દીધી છે. આ બધાની વચ્ચે ભાજપના આંતરિક રાજકારણમાંથી સૌથી મોટા સમાચાર સામે આવી રહ્યા છે, જ્યાં રાજકોટ અને સમગ્ર સૌરાષ્ટ્રના રાજકારણમાં અચાનક હલચલ મચી ગઈ છે. લાંબા સમયથી પક્ષમાં સાઈડલાઈન ચાલી રહેલા અને સત્તા કે સંગઠનથી અલિપ્ત રહેલા અગ્રણી નેતાઓ હવે ફરીથી સક્રિય થતા જોવા મળી રહ્યા છે, જેના કારણે રાજકીય બેડામાં ભારે ચર્ચાઓનો દોર શરૂ થઈ ગયો છે.
આ સમગ્ર ઘટનાનું સૌથી રસપ્રદ પાસું એ છે કે રાજકોટના સ્થાનિક રાજકારણમાં અગાઉ પરસ્પર વિરોધી જૂથોમાં ગણાતા અને હંમેશા સામસામે રહેતા ભરત બોઘરા અને નીતિન ભારદ્વાજ એકાએક સાથે દિલ્હી પહોંચ્યા છે. આ બંને જૂના જોગીઓએ દિલ્હી દરબારમાં ધામા નાખીને કેન્દ્રીય નેતૃત્વ સુધી પોતાની વાત પહોંચાડવા માટે ખાસ મુલાકાતો યોજી છે. અગાઉ મુખ્યમંત્રીની સી.આર.પાટીલ સાથે બેઠક યોજાયા બાદ તુરંત જ આ બંને નેતાઓની દિલ્હી દોડ અને કેન્દ્રીય મંત્રી પાટીલ સાથેની મુલાકાતને કારણે રાજકોટથી લઈને ગાંધીનગર સુધીના પક્ષીય વર્તુળોમાં ભારે ઉત્સુકતા જોવા મળી રહી છે.
વર્ષ 2027ની ચૂંટણીઓ પૂર્વે આ બંને દિગ્ગજ નેતાઓની અચાનક દિલ્હી સક્રિયતાને આગામી ચૂંટણીની તૈયારીઓ સાથે જોડીને જોવામાં આવી રહી છે. એક જ મંચ પર સાથે દેખાયેલા આ નેતાઓના કારણે સૌરાષ્ટ્રના રાજકીય સમીકરણો આગામી સમયમાં સંપૂર્ણપણે બદલાય તેવી પૂરેપૂરી શક્યતાઓ સેવાઈ રહી છે. હાલના તબક્કે આ હાઈ-પ્રોફાઈલ મુલાકાતની રાજકોટ ભાજપના આંતરિક માળખા પર ઘેરી અસર પડવાની સંભાવના છે, અને આ દિલ્હી મુલાકાતના અંતે સૌરાષ્ટ્ર ભાજપમાં શું નવા સમીકરણો રચાય છે તેના પર હવે સૌની નજર ટકેલી છે.
