અમેરિકાના ન્યૂ યોર્ક શહેરમાંથી એક મોટો અને ચોંકાવનારો મામલો સામે આવ્યો છે, જ્યાં 27 વર્ષીય હેલિમા સલમાન નામના US સિટિઝનને કુખ્યાત આતંકવાદી સંગઠન ISIS સાથે જોડાવવા અને ત્યાં હથિયારોની ટ્રેનિંગ લેવા બદલ દોષિત જાહેર કરવામાં આવી છે. પ્રોસિક્યુટર્સે કોર્ટમાં દાવો કર્યો હતો કે હેલિમાએ આ ઉગ્રવાદી સંગઠન પ્રત્યે પોતાની વફાદારી દર્શાવી હતી અને તેની ગતિવિધિઓમાં સક્રિયપણે ભાગ લીધો હતો. આ કેસની સુનાવણી દરમિયાન જ્યુરી સમક્ષ એક વિડિયો રજૂ કરવામાં આવ્યો હતો, જેમાં તે એસોલ્ટ રાઈફલ પકડેલી નજરે પડી હતી. આ ઉપરાંત, સંગઠનના ફ્લેગ સાથેનો ફોટો અને તેના પતિને મોકલેલા પ્રેમભર્યા ટેક્સ્ટ મેસેજ પણ પુરાવા તરીકે રજૂ કરવામાં આવ્યા હતા, જેના આધારે બ્રુકલિનના US એટર્ની જોસેફ નોસેલા જુનિયરે જણાવ્યું હતું કે આ ચૂકાદો સલમાનને આતંકવાદી સંગઠન સાથે હાથ મિલાવવા બદલ જવાબદાર ઠેરવે છે.
આ કેસની વિગતવાર વાત કરીએ તો, હેલિમાના વકીલોએ બચાવ કરતા જણાવ્યું હતું કે જ્યારે તે માત્ર 17 વર્ષની સગીર હતી ત્યારે તેના પિતા તેને સીરિયા લઈ ગયા હતા અને ત્યાં તેની મરજી વિરુદ્ધ ISIS ફાઈટર સાથે લગ્ન કરાવી દીધા હતા. હેલિમાએ કોર્ટમાં રડતા-રડતા સાક્ષી આપતા કહ્યું હતું કે સીરિયાના ગૃહયુદ્ધમાં તે ફસાઈ ગઈ હતી અને ત્યાંથી ભાગવાનો પ્રયત્ન કરવા પર મોતની સજા મળતી હોવાથી તે લાચાર હતી. તેણે એમ પણ સ્વીકાર્યું હતું કે 2017માં તેના પિતા તેને તુર્કીમાં પરિવારના સભ્યોને મળવાના બહાને લઈ ગયા હતા, પરંતુ રસ્તામાં માસ્ક પહેરેલા બંદૂકધારીઓએ તેમને ઘેરી લીધા હતા અને તેઓ સીરિયા પહોંચી ગયા હતા. બીજી બાજુ, પ્રોસિક્યુટર્સે દલીલ કરી હતી કે હેલિમાએ સ્વેચ્છાએ આ સંગઠનની પ્રવૃત્તિઓમાં ભાગ લીધો હતો અને તે જેટલી નિર્દોષ હોવાનો દાવો કરે છે તેટલી નથી, કારણ કે તેણે તેના પતિને ઓસામા બિન લાદેનનું એક ધાર્મિક ગીત પણ મોકલ્યું હતું.
આ કેસમાં જ્યુરી દ્વારા લાંબી ચર્ચાઓ બાદ આખરે મંગળવારે ચુકાદો આપવામાં આવ્યો હતો, જેને સાંભળીને કોર્ટરૂમમાં હેલિમા અને તેની માતા ભાંગી પડ્યા હતા અને બંને રડી પડ્યા હતા. આ ગંભીર અપરાધ સાબિત થવાને કારણે હેલિમા સલમાનને મહત્તમ 10 વર્ષ સુધીની જેલની સજા થઈ શકે છે, અને આ મામલે આગામી વર્ષે 2 ફેબ્રુઆરીના રોજ સજાનું એલાન કરવામાં આવશે. વર્ષ 2019માં સીરિયાના બઘૌઝ વિસ્તારમાં ISIS વિરોધી દળો દ્વારા તેને અટકાયતમાં લેવામાં આવી હતી અને વર્ષ 2024માં જ્યારે તે ન્યૂ યોર્ક પાછી ફરી ત્યારે US ઓથોરિટી દ્વારા તેની ધરપકડ કરવામાં આવી હતી. જોકે, બચાવ પક્ષના વકીલો જજને આ વર્ડિક્ટ રદ કરવા અને તેને નિર્દોષ જાહેર કરવા અપીલ કરી રહ્યા છે, પરંતુ આ પ્રકારની અરજીઓ ભાગ્યે જ સ્વીકારવામાં આવતી હોય છે.
