મુંબઈના વિલે પાર્લેની એક હાઉસિંગ સોસાયટીમાં મેનેજિંગ કમિટી દ્વારા આચરવામાં આવેલી ગેરરીતિ અને રૂપિયા 3.08 કરોડના ફંડની હેરાફેરી સામે અવાજ ઉઠાવનાર 6 ઘરમાલિકોને પરેશાન કરવા સોસાયટીએ અનોખો કિમિયો અપનાવ્યો હતો. સોસાયટીએ આ 6 સભ્યોને ઘેરવા માટે વર્ષ 2024ના જૂન, જુલાઈ અને ઓગસ્ટ મહિનામાં તેમના માસિક મેન્ટેનન્સ ચાર્જમાં એકસામટી રૂપિયા 71,429 નો તોતિંગ વધારો કરી દીધો હતો. જ્યારે આ સભ્યોએ આટલું મોટું બિલ આવવાનું કારણ પૂછ્યું, ત્યારે સોસાયટીએ દલીલ કરી કે આ વધારાની રકમ તેમની સામે કરવામાં આવેલા કાનૂની ખર્ચને પહોંચી વળવા માટે છે. આ મનસ્વી નિર્ણયથી નારાજ થઈને આ છ સભ્યોએ સોસાયટી વિરુદ્ધ કોર્ટમાં બીજી વાર કેસ દાખલ કર્યો હતો, કારણ કે તેમને લાગ્યું કે આ બધું તેમને ડિફોલ્ટર સાબિત કરવા અને ડરાવવા માટે કરવામાં આવી રહ્યું છે.
આ કેસની સુનાવણી મહારાષ્ટ્ર કો-ઓપરેટીવ અપેલાટ કોર્ટના જસ્ટીસ એ.એસ. વાનવે સમક્ષ થઈ હતી, જેમણે 14 ઓક્ટોબર, 2026ના રોજ આ મામલે ઐતિહાસિક વચગાળાનો આદેશ આપ્યો હતો. કોર્ટે તપાસ કરતા બહાર આવ્યું કે સોસાયટીએ કોઈ પણ અગાઉના અધિકૃત ઠરાવ વિના જ 7 જૂન, 2024ના રોજ જ આ કાનૂની ખર્ચ સભ્યોના મેન્ટેનન્સ બિલમાં નાખી દીધો હતો, જ્યારે સોસાયટીની સામાન્ય સભા (AGM) નો ઠરાવ તો ઘણો મોડો એટલે કે 3 સપ્ટેમ્બર, 2024ના રોજ પસાર થયો હતો. સોસાયટીના પોતાના નિયમો (બાય-લોઝ 64, 65 અને 66) સ્પષ્ટ કહે છે કે કાનૂની ખર્ચ એ સોસાયટીનો સર્વિસ ચાર્જ ગણાય છે અને તેને તમામ સભ્યો વચ્ચે સરખા ભાગે વહેંચવો પડે છે. કોર્ટે સ્પષ્ટ નોંધ્યું કે સોસાયટીએ આ છ સભ્યોને ખોટી રીતે દબાવવા અને કાનૂની લડાઈ લડતા અટકાવવા માટે આ ગેરકાયદેસર રસ્તો અપનાવ્યો હતો.
અદાલતે હાઉસિંગ સોસાયટીની આ દાદાગીરી અને મનમાની સામે કડક વલણ અપનાવતા તાત્કાલિક અસરથી આ પ્રકારે મેન્ટેનન્સ બિલમાં લીગલ ખર્ચ અને તેના પરનું વ્યાજ વસૂલવા પર રોક લગાવી દીધી છે. કોર્ટે સોસાયટીને આદેશ આપ્યો છે કે તેણે આ છ સભ્યો પાસેથી અત્યાર સુધી વસૂલેલી તમામ વધારાની રકમ તાત્કાલિક પરત કરવી પડશે. વકીલ આરાધના ભણશાલીના જણાવ્યા મુજબ, કોઈ પણ મેનેજિંગ કમિટી કાયદાની મર્યાદા બહાર જઈને પોતાના વ્યક્તિગત એજન્ડા ચલાવી શકે નહીં કે ન્યાય મેળવવા માટે કોર્ટમાં ગયેલા સભ્યો સાથે બદઈરાદાથી વર્તી શકે નહીં. મુખ્ય વિવાદનો આખરી નિર્ણય ન આવે ત્યાં સુધી આ સ્ટે ચાલુ રહેશે, જે ભ્રષ્ટ કમિટીઓ માટે એક મોટો તમાચો સાબિત થયો છે.
