આજકાલ રોજિંદા કામો માટે કેબ કે ગ્રોસરીની જેમ જ ઘરમાં મદદનીશ મેળવવાનો ટ્રેન્ડ ઝડપથી વધી રહ્યો છે. ઓનલાઈન પ્લેટફોર્મ સ્નેબિટના ફાઉન્ડર અને સીઈઓ આયુષ અગ્રવાલે તાજેતરમાં એક મીડિયા શો દરમિયાન ભારતના હોમ સર્વિસ માર્કેટને લઈને મોટા દાવા કર્યા છે. તેમનું માનવું છે કે ભારતનું હોમ સર્વિસ માર્કેટ વર્ષ 2030 સુધીમાં 100 બિલિયન ડોલરના આંકડાને સ્પર્શી શકે છે, કારણ કે હવે લોકો પરંપરાગત રીતો છોડીને એપ આધારિત ઘરેલું મદદ તરફ વળી રહ્યા છે.
આયુષ અગ્રવાલે આ ચર્ચામાં જણાવ્યું હતું કે તેમની કંપની 99.3 ટકા જેટલી બુકિંગ સફળતાપૂર્વક પૂરી કરવાનો દાવો કરે છે. આ બિઝનેસમાં વર્કફોર્સની ઉપલબ્ધતા વિશે વાત કરતા તેમણે સ્પષ્ટ કર્યું કે જેટલું લોકો વિચારે છે તેટલી સમસ્યા નથી. આ ઉપરાંત, આ પ્લેટફોર્મ પર કામ કરતા લોકોને દર મહિને 40,000 રૂપિયા સુધીની કમાણી થતી હોવાના જાહેરાતના દાવા પાછળનું અસલી ગણિત પણ તેમણે સમજાવ્યું હતું. મહિલાઓની વર્કફોર્સમાં ભાગીદારીથી લઈને ઘરના રસોઈયા અને સલૂન જેવી સર્વિસિસનું ભવિષ્ય આ બિઝનેસનું મુખ્ય કેન્દ્ર છે.
ભારતના આ વિશાળ અનૌપચારિક બજારને ડિજિટલ અને વ્યવસ્થિત રૂપ આપવા માટે સ્નેબિટ જેવી કંપનીઓ મેદાનમાં છે. જો કે, ઝડપી ગ્રોથની સાથે સાથે આ બિઝનેસને પ્રોફિટેબલ બનાવવો એ પણ એક મોટો પડકાર છે. આ 10 મિનિટમાં સર્વિસ પૂરી પાડવાના વાયદાને કારણે ગ્રાહકો તો જોડાઈ રહ્યા છે, પરંતુ આ મોડેલ લાંબા ગાળે કેટલું ટકાઉ સાબિત થાય છે અને તે પરંપરાગત નોકરાણી કે કામવાળા લોકોની જગ્ચા કેવી રીતે લે છે તે આગામી સમય જ નક્કી કરશે.
