ઇઝરાયેલમાં યોજાયેલી મહત્ત્વની ચૂંટણીના પ્રારંભિક એક્ઝિટ પોલ સામે આવ્યા છે, જેમાં પ્રાઇમ મિનિસ્ટર બેન્જામિન નેતન્યાહુને મોટો ફટકો પડ્યો હોય તેવું સ્પષ્ટ દેખાઈ રહ્યું છે. દેશની મુખ્ય ટીવી ચેનલ્સ દ્વારા જારી કરવામાં આવેલા એક્ઝિટ પોલ મુજબ બેન્જામિન નેતન્યાહુનો બ્લોક અને તેમના મુખ્ય પ્રતિસ્પર્ધી તથા પૂર્વ મિલિટરી ચીફ ગાડી આઈઝેનકોટનો કેમ્પ બંને આશરે 51 સીટો જીતી શકે છે, જ્યારે આરબ-કેન્દ્રિત પાર્ટીઓએ આશરે 18 સીટો મેળવી છે. ઇઝરાયેલની 120 સીટોવાળી સંસદમાં બહુમતી માટે જરૂરી જાદુઈ આંકડો મેળવવા માટે કોઈ એક પાર્ટી સક્ષમ ન રહેતા આગામી દિવસોમાં સરકાર બનાવવા માટે ભારે રાજકીય ખેંચતાણ જોવા મળશે તે નક્કી છે.
આ ચૂંટણીમાં 7 વર્ષના લાંબા શાસન બાદ બેન્જામિન નેતન્યાહુ સામે જનતાનો રોષ સ્પષ્ટ વર્તાયો છે, કારણ કે અતિ-રૂઢિચુસ્ત યહૂદીઓ માટે લશ્કરી ભરતીમાં મુક્તિ અને ફાર-રાઈટ પાર્ટીઓ સાથેની યુતિથી મતદારો નારાજ હતા. સેન્ટ્રલ ઇલેક્શન્સ કમિટીના જણાવ્યા અનુસાર 1999 પછીનું સૌથી ઊંચું આશરે 77% મતદાન નોંધાયું હતું જેમાં 7 મિલિયનથી વધુ લાયક મતદારોમાંથી હજારો લોકો વિદેશથી પણ વોટ નાખવા આવ્યા હતા. ગાઝા યુદ્ધ, લેબનોન અને ઈરાન સાથેના તણાવ તેમજ ઇન્ટરનેશનલ લેવલે વધી રહેલા દબાણ વચ્ચે યોજાયેલી આ ચૂંટણીમાં વિપક્ષી નેતા ગાડી આઈઝેનકોટના સમર્થકોએ એક્ઝિટ પોલના પરિણામો બાદ ખુશી વ્યક્ત કરી છે અને નવી સરકાર બનાવવાનો દાવો કર્યો છે.
હવે ઇઝરાયેલના પ્રેસિડેન્ટ દ્વારા સૌથી વધુ સીટ જીતનારા અથવા સરકાર બનાવવાની ક્ષમતા ધરાવતા પક્ષના નેતાને સરકાર રચવા માટે આમંત્રણ આપવામાં આવશે. જો કે, જો કોઈ પક્ષ બહુમતી સાબિત નહીં કરી શકે તો આવતા વર્ષની શરૂઆતમાં ફરીથી ચૂંટણી યોજાવાની નોબત આવી શકે છે, જે અગાઉ 2019થી 2022 વચ્ચે પણ જોવા મળ્યું હતું. બેન્જામિન નેતન્યાહુએ આરબ પાર્ટીઓ વિરુદ્ધ ચેતવણી આપીને મજબૂત રાઇટ-વિંગ સરકારની હિમાયત કરી છે, ત્યારે ગાડી આઈઝેનકોટ આરબ પાર્ટીઓ સાથે હાથ મિલાવીને નવી સરકાર રચે કે પછી દેશમાં રાજકીય અનિશ્ચિતતા લાંબી ચાલે તે આગામી સમય જ કહેશે.
