બાંગ્લાદેશના સત્તા પરથી હટી ચૂકેલા પૂર્વ વડાપ્રધાન શેખ હસીનાએ હાલની સરકાર સામે મોરચો ખોલ્યો છે. સોશિયલ મીડિયા પર અવામી લીગ દ્વારા જારી કરાયેલા એક નિવેદનમાં હસીનાએ આક્ષેપ કર્યો છે કે અત્યારનું બાંગ્લાદેશ માસ અરેસ્ટ, સર્ચ અને અત્યાચારનું કેન્દ્ર બની ગયું છે. 2024માં થયેલા સરકાર વિરોધી વિરોધ પ્રદર્શનો બાદ સત્તા ગુમાવીને દેશ છોડી ચૂકેલા હસીનાએ જણાવ્યું કે દેશમાં આજે કોઈ કાયદો કે પબ્લિક સુરક્ષા બચી નથી અને લોકશાહીના ધજાગરા ઉડી રહ્યા છે.
હસીનાએ દાવો કર્યો છે કે ગોપાલગંજ સહિત દેશના અનેક વિસ્તારોમાં લૉ એફોર્સમેન્ટ એજન્સીઓ દ્વારા મોટા પાયે દરોડા પાડવામાં આવી રહ્યા છે અને દરરોજ 5000 થી 7000 લોકોની ધરપકડ કરવામાં આવી રહી છે. તેમણે આક્ષેપ કર્યો કે વર્તમાન સરકારે અવામી લીગ પાર્ટીને દેશમાંથી ખતમ કરવાનું મિશન બનાવી લીધું છે. આ સાથે તેમણે દેશની ખરાબ આર્થિક સ્થિતિ પર સવાલ ઉઠાવતા કહ્યું કે ગેસ, ઇલેક્ટ્રિસિટી, ફ્યુઅલ અને ફર્ટિલાઇઝરની અછત છે, મોંઘવારી અને બેરોજગારી વધી રહી છે તેમજ ફેક્ટરીઓ બંધ થવાથી રોકાણને પણ ભારે બ્રેક લાગી છે.
ઉલ્લેખનીય છે કે 5 ઓગસ્ટ 2024ના રોજ હિંસક સ્ટુડન્ટ પ્રોટેસ્ટ બાદ હસીનાની સરકાર તૂટી ગઈ હતી અને તેઓ ભારત આવીને રહે છે. આ પછી બાંગ્લાદેશની ઇન્ટરિમ ગવર્મેન્ટે એન્ટી ટેરર લૉ હેઠળ અવામી લીગ પર પ્રતિબંધ મૂક્યો હતો. નવેમ્બર 2025માં ઇન્ટરનેશનલ ક્રાઇમ્સ ટ્રिब્યુનલે 2024ના પ્રોટેસ્ટ દરમિયાન માનવતા વિરોધી અપરાધો માટે હસીનાને ગેરહાજરીમાં ડેથ સેન્ટેન્સ પણ સંભળાવ્યું છે. જોકે, હસીનાએ આ તમામ આરોપોને રાજકીય બદલાની ભાવનાથી પ્રેરાયેલા ગણાવ્યા છે, જ્યારે બાંગ્લાદેશ સરકાર તેમના એક્સટ્રાડિશન એટલે કે પ્રત્યાર્પણની સતત માંગ કરી રહી છે.
