ઇઝરાયેલની રાજનીતિમાં મોટો ધડાકો થયો છે, જ્યાં બુધવારે સવારે વિપક્ષી ઉમેદવાર ગાડી આઈસેનકોટે સ્પષ્ટપણે જણાવ્યું કે દેશે હવે બદલાવ સ્વીકારી લીધો છે અને તેઓ નવી સરકાર બનાવવા માટે પૂરી તાકાત લગાવશે. મંગળવારે યોજાયેલી ચૂંટણીમાં રેકોર્ડબ્રેક મતદાન જોવા મળ્યું હતું અને એક્ઝિટ પોલના આંકડા મુજબ વિપક્ષી બ્લોકને વર્તમાન PM બેન્જામિન નેતન્યાહૂના રાઈટ-વિંગ બ્લોક સામે સામાન્ય સરસાઈ મળી રહી છે. જોકે, ચૂંટણીના આ જંગમાં હજુ સુધી કોઈ પણ પક્ષને સ્પષ્ટ બહુમતી મળી શકી નથી, જેના કારણે રાજકીય સમીકરણો બદલાવાની પૂરી સંભાવના છે.
સમગ્ર ચૂંટણી પ્રચાર દરમિયાન અને પરિણામોના માહોલ વચ્ચે ગાડી આઈસેનકોટે પોતાના સમર્થકોને સંબોધિત કરતા નેતન્યાહૂ પર આકરા પ્રહારો કર્યા હતા. તેમણે કડક શબ્દોમાં ચેતવણી આપતા કહ્યું કે નેતન્યાહૂ પોતાના રાજકીય ફાયદા માટે ઈરાન પર હુમલો કરવા જેવી દેશની સુરક્ષા સાથે ચેડાં કરવાની હરકત બિલકુલ ન કરે, કારણ કે આવા કટોકટીના માહોલનો ઉપયોગ ગઠબંધન સરકાર બનાવવાની પ્રક્રિયાને અટકાવવા માટે થઈ શકે છે. આઈસેનકોટે ભારપૂર્વક જણાવ્યું કે જનતાએ નેતન્યાહૂના લાંબા શાસન વિરુદ્ધ સ્પષ્ટનારો આપી દીધો છે અને આટલા મોટા ટર્નઆઉટ બાદ વારંવાર ચૂંટણી યોજવી એ મોટી ભૂલ સાબિત થશે.
આ ચૂંટણી પરિણામો અને વિપક્ષી નેતાના આક્રમક વલણથી ઇઝરાયેલની રાજનીતિમાં હવે ગરમાવો આવી ગયો છે અને આગામી દિવસોમાં સત્તા કબજે કરવા માટે જોરદાર રસાકસી જોવા મળશે. કોઈ પણ પક્ષને બહુમતી ન મળવાને કારણે સરકાર બનાવવા માટે નાના પક્ષો સાથે ગઠબંધન કરવું અનિવાર્ય બન્યું છે. હવે જોવાનું એ રહેશે કે ગાડી આઈસેનકોટે કરેલા સરકાર રચવાના દાવા કેટલા સફળ થાય છે અને બેન્જામિન નેતન્યાહૂ આ રાજકીય ખેલમાં શું નવો દાવ ખેલે છે.
