પાકિસ્તાનના અશાંત ગણાતા બલૂચિસ્તાન પ્રાંતમાંથી એક મોટા અપહરણના સમાચાર સામે આવ્યા છે, જ્યાં કલાતના વર્તમાન ખાન સુલેમાન ખાન દાઉદના પુત્ર પ્રિન્સ મુહમ્મદ ખાન અહેમદઝઈનું તેમની સાથેના 3 ગનમેન સાથે અપહરણ કરી લેવામાં આવ્યું છે. પોલીસ દ્વારા મંગળવારે આ વાતની સત્તાવાર પુષ્ટિ કરવામાં આવી છે. પ્રિન્સ અહેમદઝઈ સોમવારે રાત્રે ખુઝદારથી કલાત તરફ પ્રવાસ કરી રહ્યા હતા ત્યારે હાઇવે પર હથિયારધારી શખ્સોએ તેમની ગાડીને રોકીને આ ઘટનાને અંજામ આપ્યો હતો. પ્રાથમિક તપાસમાં સામે આવ્યું છે કે હુમલાખોરો પ્રિન્સ અને તેમના ત્રણેય ગનમેનને બળજબરીથી કોઈ અજ્ઞાત સ્થળે લઈ ગયા છે.
ક્વેટા સ્થિત પોલીસ હેડઓફિસ દ્વારા જારી કરવામાં આવેલા નિવેદન અનુસાર, સોમવારે મોડી રાત્રે બનેલી આ ઘટના બાદ પોલીસ અને સુરક્ષા એજન્સીઓ હરકતમાં આવી ગઈ છે. કલાતના ખાન એ બલૂચિસ્તાનના ભૂતપૂર્વ રિયાસતી શાસકોનું ઐતિહાસિક પદ છે, અને હાલના ખાન સુલેમાન દાઉદ યુનાઇટેડ કિંગડમ અને વેલ્સમાં રહે છે. કલાતના ખાનનો પરિવાર બલૂચિસ્તાનમાં રાજકીય એકતા સ્થાપવામાં અને ત્યાંના લોકોની સાંસ્કૃતિક ઓળખ ઊભી કરવામાં મહત્વની ભૂમિકા ભજવતો હોવાને કારણે ખૂબ જ સન્માનીય માનવામાં આવે છે. આ પરિવાર સાથે જોડાયેલી આ મોટી ઘટનાને કારણે સ્થાનિક રાજકારણ અને સુરક્ષા વ્યવસ્થા પર ગંભીર સવાલો ઊભા થયા છે.
આ અપહરણકાંડ બાદ બલૂચિસ્તાનની સુરક્ષા સ્થિતિ સામે ફરી એકવાર મોટો પ્રશ્નાર્થ ચિહ્ન લાગી ગયો છે. પોલીસ અને સુરક્ષા દળો દ્વારા અપહરણકારોને પકડવા અને પ્રિન્સ અહેમદઝઈ તથા તેમના ગનમેનને હેમખેમ છોડાવવા માટે સર્ચ ઓપરેશન તેજ કરી દેવામાં આવ્યું છે. આ ઘટના પાછળ કોનો હાથ છે અને અપહરણ પાછળનો હેતુ શું છે તે અંગે હજુ સુધી કોઈ સ્પષ્ટ માહિતી સામે આવી નથી, પરંતુ પોલીસ આ મામલે તમામ એંગલથી તપાસ કરી રહી છે અને આગામી સમયમાં મોટા ખુલાસા થવાની શક્યતા છે.
