ગીર સોમનાથ જિલ્લાના ઉના તાલુકાના વાંસોજ ગામેથી એક અત્યંત હૃદયદ્રાવક સમાચાર સામે આવ્યા છે, જ્યાં રાત્રિભોજન લીધા બાદ એક જ પરિવારના ૩ સભ્યોની તબિયત અચાનક બગડી ગઈ હતી. પ્રાથમિક માહિતી મુજબ રાત્રે જમ્યા બાદ મોડી રાત્રે અંદાજે 2 વાગ્યે પરિવારના સભ્યોએ અસ્વસ્થતા અનુભવતા ગામમાં જ પ્રાથમિક સારવાર લીધી હતી. જોકે સવારના સમયે માતા અને પિતા બંનેને અચાનક ચક્કર આવવાની અને અશક્તિની ગંભીર સમસ્યા ઊભી થતાં પરિવારે તાત્કાલિક ઘરે જ સ્થાનિક ડૉક્ટરને બોલાવવાની ફરજ પડી હતી.
ઘરમાં જ્યારે બીમાર માતા અને પિતાની સારવાર ચાલી રહી હતી, તે જ સમયે તેમની ૩ વર્ષની માસૂમ પુત્રી જીનલ અચાનક બેભાન થઈને જમીન પર ઢળી પડી હતી. બાળકીની નાજુક હાલત જોઈને પરિવારના શ્વાસ અધ્ધર થઈ ગયા હતા અને તાત્કાલિક 108 એમ્બ્યુલન્સ બોલાવીને તેને હોસ્પિટલ ખસેડવામાં આવી હતી, પરંતુ ત્યાં ફરજ પરના ડૉક્ટરે તેને મૃત જાહેર કરી હતી. બીજી તરફ ગંભીર અશક્તિ અને બીમારીનો ભોગ બનેલા બાળકીના માતા અને પિતાને વધુ સારવાર માટે ઉનાની ખાનગી હોસ્પિટલમાં દાખલ કરવામાં આવ્યા છે, જ્યાં હાલ તેમની સારવાર ચાલી રહી છે.
આ કરુણ બનાવની જાણ થતાં જ નવાબંદર મરીન પોલીસનો કાફલો તાત્કાલિક ઘટનાસ્થળે દોડી ગયો હતો અને કાયદેસરની તપાસ શરૂ કરી હતી. માસૂમ બાળકીના અકાળે થયેલા મોત પાછળ ખોરાકી ઝેરી અસર છે કે પછી કોઈ અન્ય ભેદી કારણ છે, તે જાણવા માટે પોલીસે તપાસ કેન્દ્રિત કરી છે. બાળકીના મૃતદેહને સાચું કારણ બહાર લાવવા માટે પોસ્ટમોર્ટમ અર્થે ખસેડવામાં આવ્યો છે અને વિગતવાર પોસ્ટમોર્ટમ રિપોર્ટ આવ્યા બાદ જ મોતનું સાચું રહસ્ય બહાર આવશે, જ્યારે આ અચાનક બનેલી દુર્ઘટનાથી સમગ્ર વાંસોજ પંથકમાં શોકનું મોજું ફરી વળ્યું છે.
