મુંબઈના છત્રપતિ શિવાજી મહારાજ આંતરરાષ્ટ્રીય એરપોર્ટ પર મંગળવારે સાંજે અચાનક સર્જાયેલી ટેકનિકલ ખામીના કારણે મુસાફરોને ભારે હાલાકી ભોગવવી પડી હતી. સાંજે અંદાજે 7:05 વાગ્યે એરપોર્ટના સર્વર અને નેટવર્કમાં ગરબડ થવાના કારણે ડિપાર્ચર હોલમાં અફરાતફરી જેવો માહોલ સર્જાયો હતો. આ અચાનક આવેલી સમસ્યાના કારણે ચેક-ઇન પ્રક્રિયા સંપૂર્ણપણે ધીમી પડી ગઈ હતી, જેના લીધે એરપોર્ટ પર હાજર સેંકડો મુસાફરો મૂંઝવણમાં મુકાઈ ગયા હતા અને લાંબી લાઇનો જોવા મળી હતી.
આ નેટવર્ક પ્રોબ્લેમના કારણે મુખ્યત્વે એર ઇન્ડિયાની આશરે 11 અને ઇન્ડિગોની 3 જેટલી ઉડાણોની ચેક-ઇન પ્રક્રિયા પર સીધી અસર પડી હતી. સિસ્ટમ ડાઉન હોવાને કારણે બોર્ડિંગ ગેટ બદલવા પડ્યા હતા અને વિમાનના ક્રૂ મેમ્બર્સની અવરજવરમાં પણ વિલંબ થયો હતો. એટલું જ નહીં, બોર્ડિંગ દરમિયાન મુસાફરોના ટિકિટ સ્કેન કરતા મશીનોની સ્પીડ પણ ખૂબ ધીમી થઈ ગઈ હતી, છતાં એરપોર્ટ પર ચેક-ઇનનું કામ સંપૂર્ણપણે બંધ નહોતું થયું પરંતુ તે ખૂબ જ ધીમી ગતિએ ચાલી રહ્યું હતું.
પરિસ્થિતિની ગંભીરતાને ધ્યાનમાં રાખીને એરપોર્ટની ટેકનિકલ ટીમો અને ઓથોરિટીએ ત્વરિત પગલાં લઈને પ્રોટોકોલ હેઠળ મેન્યુઅલ પદ્ધતિથી કામકાજ શરૂ કરી દીધું હતું જેથી મુસાફરોને વધુ હેરાનગતિ ન થાય. એરપોર્ટ સંચાલકોના જણાવ્યા મુજબ આ ટેકનિકલ ખામીના કારણે ફ્લાઇટ્સના ઓવરઓલ સંચાલન પર કોઈ મોટી વ્યાપક અસર નથી પડી અને સમયસર ટીમો કામે લાગી જવાથી ટૂંક સમયમાં જ સ્થિતિ પર સંપૂર્ણ કાબૂ મેળવી લેવામાં આવ્યો હતો.
