દુનિયાભરમાં પોતાના અવાજ અને ગાયકીથી કરોડો દિલ જીતનારી પોપ સુપરસ્ટાર બિયॉन्सની ચેરિટી ફાઉન્ડેશન 'બેગુડ' દ્વારા એક ખૂબ જ સરાહનીય પગલું ભરવામાં આવ્યું છે. આ ફાઉન્ડેશને 'ઇન અ પરફેક્ટ વર્લ્ડ' નામની નોન-પ્રોફિટ ઓર્ગેનાઇઝેશનને 50,000 ડોલરનું અનુદાન આપ્યું છે. આ સંસ્થા મુખ્યત્વે યુવાનોના શિક્ષણ, સર્જનાત્મકતા, સામાજિક જાગૃતિ અને લીડરશિપ ડેવલપમેન્ટ માટે કામ કરે છે. તાજેતરમાં જ ઇન્સ્ટાગ્રામ પર શેર કરવામાં આવેલા એક વિડિયોમાં બેગુડની ડિજિટલ એડિટોરિયલ કન્ટેન્ટ મેનેજર અલાના જે. બેરફિલ્ડે આ સહાયની જાહેરાત કરતાં સંસ્થાના ઉત્તમ કાર્યોની પ્રશંસા કરી હતી અને તેમને આ ઇકોસિસ્ટમમાં આવકાર્યા હતા.
માનુેલા ટેસ્ટોલિની દ્વારા સ્થાપિત આ સંસ્થા યુવાનોને સિવિલ લાઇફમાં ભાગ લેવા અને નેતૃત્વ સંભાળવાની તાલીમ આપે છે. આ સંસ્થાના 'યુથ એમ્બેસડર્સ' અને 'રીચ' જેવા મુખ્ય પ્રોગ્રામ્સ શાળાઓ અને શૈક્ષણિક સંસાધનોને મજબૂત કરવાનું કામ કરે છે. અત્યાર સુધીમાં આ સંસ્થાએ દુનિયાના 8 દેશોમાં 35 સ્કૂલ પ્રોજેક્ટ્સ પૂરા કર્યા છે તેમજ હાઇ-પોવર્ટી એરિયાની 500થી વધુ ક્લાસરૂમ્સમાં કામ કર્યું છે. એટલું જ નહીં, યુવાનોના નેતૃત્વમાં 20,000 કલાકની સોશિયલ સર્વિસ દ્વારા અત્યાર સુધીમાં કુલ 50,000 લોકોના જીવન પર સકારાત્મક પ્રભાવ પાડવામાં આવ્યો છે. સંસ્થાના સંચાલકો યુનાઇટેડ સ્ટેટ્સથી યુવા લિડર્સને સેન્ટ્રલ અમેરિકાના સ્વદેશી સમુદાયોમાં શાળાઓ બનાવવા માટે પણ મોકલે છે.
વર્તમાન સમયમાં જ્યારે શાળાઓ અને આફ્ટર-સ્કૂલ પ્રોગ્રામ્સને ફંડિંગની તંગીનો સામનો કરવો પડી રહ્યો છે, ત્યારે બિયॉन्सની આ મદદ ખૂબ જ યોગ્ય સમયે મળી છે. સંસ્થાના વડાના જણાવ્યા મુજબ આ ગ્રાન્ટથી સેંકડો વધુ જરૂરિયાતમંદ બાળકો સુધી પ્રોગ્રામ્સનો વિસ્તાર કરી શકાશે. બિયॉन्स દ્વારા 2013માં શરૂ કરાયેલું બેગુડ ફાઉન્ડેશન શિક્ષણ, એન્ટ્રપ્રિન્યોરશિપ અને કોમ્યુનિટી રિસ્પોન્સ જેવા મુખ્ય સ્તંભો પર કામ કરે છે. અગાઉ પણ આ ફાઉન્ડેશને લોસ એન્જલસના વાઇલ્ડફાયર, ફ્લોરિડાના હરિકેન પીડિતોની મદદ ઉપરાંત સ્કૉલરશિપ અને માર્ચિંગ બેન્ડ્સને લાખો ડોલરની આર્થિક સહાય પૂરી પાડી છે.
