স্ট্যান্ডર્ડ ગ્રેજ્યુએટ સ્કૂલ ઓફ બિઝનેસમાં આપેલા એક ઇન્ટરવ્યુમાં ઓપનએઆઈના સીઈઓ સેમ અલ્ટમેને ખુલીને વાત કરી છે. તેમણે કહ્યું કે એમબીએ પાસ કરીને બહાર આવતા યુવાનો હંમેશા એવા કેરિયર પાથ પસંદ કરે છે જે પાંચ વર્ષ પહેલાં ટ્રેન્ડમાં હતા, જ્યારે આજે સમય સંપૂર્ણપણે બદલાઈ ચૂક્યો છે. અલ્ટમેનના મતે એઆઈ આગામી સમયમાં જોબ માર્કેટને સંપૂર્ણપણે બદલી નાખશે, તેમ છતાં બિઝનેસ સ્કૂલના સ્ટુડન્ટ્સ નવી તકો શોધવાને બદલે જૂની વાસી પદ્ધતિઓ પાછળ સમય બરબાદ કરી રહ્યા છે, જે તેમની માટે એક કાયમી નિરાશા સમાન છે.
આજે સોફ્ટવેર ડેવલપમેન્ટથી લઈને કસ્ટમર સર્વિસ, હેલ્થકેર, ફાઇનાન્સ અને એજ્યુકેશન જેવા ક્ષેત્રોમાં એઆઈ ક્રાંતિ લાવી રહ્યું છે. અલ્ટમેને સ્વીકાર્યું છે કે ભવિષ્યમાં માનવીય કામો એઆઈ દ્વારા વધુ સસ્તા અને ઝડપી ચોકસાઈથી થશે, જેનું પરિવર્તન થોડું લાંબુ ચાલશે. જોકે, આ બદલાવથી ડરવાની જરૂર નથી પણ તે મહેનતુ કર્મચારીઓ અને એન્ટરપ્રેન્યોર્સ માટે નવી સોનેરી તકો લઈને આવ્યો છે. માર્ક ક્યુબન અને રેડિટના કો-ફાઉન્ડર એલેક્સિસ ઓહાનિયન જેવા દિગ્ગજ ટેક લીડર્સ પણ માને છે કે જે કંપનીઓ કે સ્ટાર્ટઅપ્સ શરૂઆતથી જ એઆઈને અપનાવશે તેઓ જ માર્કેટમાં સૌથી આગળ રહેશે.
અલ્ટમેનના પોતાના અનુભવ મુજબ જ્યારે પણ દુનિયામાં મોટો ટેકનોલોજીકલ બદલાવ આવે છે, ત્યારે જ નવા સાહસો ઊભા કરવાનો સૌથી શ્રેષ્ઠ સમય હોય છે. આજે એઆઈના પાયા પર એવી મોટી કંપનીઓ બનાવી શકાય છે જે કલ્પના બહારની હોય. ભૂતકાળમાં સ્ટેનફોર્ડ છોડીને લૂપ્ટ જેવું સ્ટાર્ટઅપ શરૂ કરનાર અને વાય કોમ્બિનેટરના પ્રમુખ રહી ચૂકેલા અલ્ટમેન માને છે કે, આજે જે યુવાનો પાસે નવા વિચારો અને સ્કીલ છે, તેઓ ઇન્ડસ્ટ્રીના આ મોટા બદલાવમાં સૌથી વધુ સફળ થઈ શકે છે.
