દેશની જાણીતી સરકારી શિપબિલ્ડિંગ કંપની મઝાગોન ડોક શિપબિલ્ડર્સ માટે જુલાઈથી સપ્ટેમ્બર એટલે કે ક્વાર્ટર 2 ના દિવસો થોડા મુશ્કેલ સાબિત થયા છે. ઓપરેશનલ રેવન્યુ અને પ્રોફિટ માર્જિન પર આવેલા ભારે દબાણને કારણે કંપનીના નાણાકીય પરિણામો નબળા રહ્યા છે. કંપનીએ આ ક્વાર્ટરમાં વાર્ષિક ધોરણે તેના ચોખ્ખા નફામાં મોટો ઘટાડો નોંધાવ્યો છે, જેના કારણે શેરબજારમાં પણ રોકાણકારોની ચિંતા વધી છે અને શેરના ભાવમાં ઘટાડો જોવા મળ્યો છે.
કંપની દ્વારા જાહેર કરવામાં આવેલા આંકડાઓ મુજબ, Q2 FY27 માં કંપનીનો ચોખ્ખો નફો વાર્ષિક ધોરણે 71 ટકા ઘટીને 199 કરોડ થયો છે, જે ગત નાણાકીય વર્ષના આ જ ક્વાર્ટરમાં 695 કરોડ હતો. આ ઉપરાંત ઓપરેશનલ રેવન્યુ પણ 16.5 ટકા ઘટીને 2,446 કરોડ રહી છે, જે અગાઉના વર્ષના સમાન ક્વાર્ટરમાં 2,929 કરોડ હતી. અગાઉના ક્વાર્ટરની સરખામણીમાં પણ રેવન્યુમાં 17 ટકાનો ઘટાડો થયો છે. કંપનીનું પ્રોફિટ માર્જિન ગત વર્ષના 23.7 ટકા સામે ઘટીને માત્ર 8.1 ટકા પર આવી ગયું છે. નબળા પરિણામોની સીધી અસર શેર પર પડી અને બીએસઈ પર કંપનીના શેરનો ભાવ ઘટીને 1,691 ના ઇન્ટ્રાડે લો સુધી પહોંચી ગયો હતો.
આ મુશ્કેલ સમય વચ્ચે કંપનીએ રોકાણકારોને રાહત આપવા માટે પ્રતિ શેર 5 રૂપિયાનું વચગાળાનું ડિવિડન્ડ જાહેર કર્યું છે, જેના માટે 03 നવેમ્બર, 2026 ની તારીખ રેકોર્ડ ડેટ તરીકે નક્કી કરવામાં આવી છે અને 26 નવેમ્બર કે તે પહેલાં ડિવિડન્ડ ચૂકવાઈ જશે. આ સાથે જ કંપનીના બોર્ડે સ્ટેટ બેંક ઓફ ઇન્ડિયા, મુંબઈ પાસેથી 1,250 કરોડની ક્રેડિટ ફેસિલિટી મંજૂર કરી છે, જે તેની સબસીડિયરી કોલંબો ડોકયાર્ડ માટે ઉપયોગમાં લેવાશે. કંપનીએ પોતાની ઓથોરાઇઝ્ડ શેર કેપિટલ વધારીને 323.72 કરોડમાંથી 900 કરોડ કરવાનો પ્રસ્તાવ પણ મૂક્યો છે.
