રોજબરોજ હાઈવે પર આવન-જાવન કરતા વાહનચાલકો માટે રસ્તા મંત્રાલય તરફથી મોટા સમાચાર સામે આવ્યા છે. કેન્દ્રીય રસ્તા પરિવહન અને હાઈવે મંત્રાલય દ્વારા નેશનલ હાઈવે ફી નિયમોમાં મહત્વનો સુધારો કરવામાં આવ્યો છે, જે અંતર્ગત આગામી 1 નવેમ્બર 2026થી સ્થાનિક વાહન માલિકો માટે ખાસ કન્સેશનલ લોકલ FASTag પાસની સુવિધા શરૂ થવા જઈ રહી છે. આ નવી વ્યવસ્થાથી આસપાસના વિસ્તારમાં રહેતા સામાન્ય લોકોને વારંવાર ટોલ ચૂકવવામાંથી મોટી રાહત મળશે અને તેઓ ફિક્સ્ડ ફી ભરીને આખો વર્ષ નિરાંતે મુસાફરી કરી શકશે.
આ નવી યોજનાનો લાભ મેળવવા માટે સરકારે કેટલાક ચોક્કસ નિયમો અને માપદંડો નક્કી કર્યા છે. જે લોકો પાસે નોન-કોમર્શિયલ હેતુ માટે નોંધાયેલું વેલિડ અને ફંક્શનલ FASTag વાળું વાહન છે અને જેઓ ટોલ પ્લાઝાથી 20 કિમીના અંતરની અંદર રહે છે, તેઓ આ પાસ માટે અરજી કરી શકશે. આ વાર્ષિક પાસનો ખર્ચ ટોલ પ્લાઝાના સ્થાન પર આધાર રાખશે. જો ટોલ પ્લાઝા મ્યુનિસિપલ કે લોકલ ટાઉન લિમિટની બહાર હશે, તો આ વાર્ષિક પાસ માત્ર 1500 રૂપિયામાં મળશે, જ્યારે મ્યુનિસિપલ કે ટાઉન લિમિટની અંદર આવેલા ટોલ પ્લાઝા માટે આ પાસનો ચાર્જ 3000 રૂપિયા રહેશે. સરકાર દર વર્ષે 1 એપ્રિલના રોજ આ રેટ્સની સમીક્ષા પણ કરી શકશે.
જો કે, આ ખાસ પાસ મેળવવા માટે કેટલીક મર્યાદાઓ પણ ધ્યાનમાં રાખવી જરૂરી છે. આ પાસ માત્ર તે જ નિશ્ચિત ટોલ પ્લાઝા માટે વેલિડ રહેશે જેના માટે તેને ઇશ્યૂ કરવામાં આવ્યો છે, એટલે કે તે બધા જ ટોલ પ્લાઝા પર કામ નહીં કરે. વળી, જો કોઈ રુટ પર ક્લોઝ્ડ યુઝર ફી કલેક્શન સિસ્ટમ હોય અથવા વૈકલ્પિક સર્વિસ રોડ ઉપલબ્ધ હોય તો આ પાસ જારી કરવામાં આવશે નહીં. પ્રાઇવેટ કાર, જીપ કે વન માટેનો આ વાર્ષિક પાસ એક વર્ષ અથવા મહત્તમ 200 ટ્રિપ (જે વહેલું પૂરું થાય) સુધી માન્ય રહેશે, જેનાથી સ્થાનિક વાહનચાલકોનો રોજિંદા મુસાફરીનો ખર્ચ ઘણો ઘટી જશે.
