કોંગ્રેસે સુપ્રીમ કોર્ટમાં સ્પેશિયલ ઇન્ટેન્સિવ રિવિઝન એટલે કે SIR બાબતે ઇલેક્શન કમિશન દ્વારા દાખલ કરવામાં આવેલા એફિડેવિટને અત્યંત ગેરમાર્ગે દોરનારું અને ધોખો આપનારું ગણાવ્યું છે. કોંગ્રેસના જનરલ સેક્રેટરી જયરામ રમેશે મંગળવારે પ્લેટફોર્મ પર આકરા પ્રહારો કરતા જણાવ્યું હતું કે ઇલેક્શન કમિશનના વલણમાં સતત બદલાવ આવી રહ્યો છે અને ફોર્મ 6 ની પ્રક્રિયામાં ગેરકાયદેસર ફેરફારો કરવામાં આવ્યા છે. તેમણે આક્ષેપ કર્યો હતો કે કમિશને પહેલા એવો દાવો કર્યો હતો કે સુપ્રીમ કોર્ટે ફોર્મ 6 સાથે જોડાયેલા નવા ડિક્લેરેશનને માન્ય રાખ્યું છે, જે બાદમાં ખોટું સાબિત થયું છે અને હવે કમિશન કહી રહ્યું છે કે આ ડિક્લેરેશન અલગ છે, જે સદંતર ભ્રામક છે કારણ કે આ મેન્ડેટરી ડિક્લેરેશન વગર ફોર્મ 6 ઓનલાઈન સબમિટ થઈ જ શકતું નથી.
આ વિવાદમાં માત્ર ફોર્મ 6 જ નહીં પરંતુ કમિશનની આંતરિક કામગીરી પર પણ મોટા સવાલો ઉઠ્યા છે. જયરામ રમેશે દાવો કર્યો હતો કે ચીફ ઇલેક્શન કમિશનર જ્ઞાનેશ કુમાર દ્વારા એકતરફી નિર્ણયો લેવામાં આવ્યા છે અને બાકીના બે ચૂંટણી કમિશનરોએ ગંભીર ઉલ્લંઘનો સામે વાંધો ઉઠાવ્યો હોવા છતાં તેમની વાત નજરઅંદાજ કરવામાં આવી હતી. આઈટી ડિવિઝન પર સવાલો ઉઠાવતા તેમણે જણાવ્યું કે ઈસીઆઈનેટનો ઉપયોગ કરીને સ્ટેટ્યુટરી ઓથોરિટી એજ ઈઆરઓ ને ઓવરરાઈડ કરવામાં આવ્યા છે અને ગોવા, વેસ્ટ બંગાળ, ઉત્તર પ્રદેશ તેમજ ઉત્તરાખંડ જેવા રાજ્યોમાં ફોર્મ 7 નો દુરુપયોગ કરીને મોટા પાયે મતદારોના નામ કમી કરવામાં આવ્યા છે. કમિશનની આ પદ્ધતિ સામે અગાઉ પણ કેબિનેટ સેક્રેટરીને પત્ર લખીને ચિંતા વ્યક્ત કરવામાં આવી હોવા છતાં કોઈ જ કાર્યવાહી કરવામાં આવી નથી.
બીજી બાજુ, ઇલેક્શન કમિશને આ તમામ આરોપોને ફગાવી દેતા સ્પષ્ટ કર્યું છે કે સ્ટેટ્યુટરી ફોર્મ 6 માં કોઈ જ ફેરફાર કરવામાં આવ્યા નથી અને કોંગ્રેસના દાખલાઓ માત્ર એક ન્યૂઝ રિપોર્ટ પર આધારિત તેમજ ગેરસમજથી ભરેલા છે. ડેપ્યુટી ઇલેક્શન કમિશનર ભાનુ પ્રકાશ યેતુરુ દ્વારા દાખલ કરવામાં આવેલા 248 પાનાના કાઉન્ટર એફિડેવિટમાં કમિશને જણાવ્યું છે કે એસઆઈઆરના તમામ ઓર્ડર બંધારણના આર્ટિકલ 324 અને એક્ટ 2023 ની સેક્શન 18 મુજબ ત્રણેય સભ્યોની સર્વસંમતિથી જ પાસ કરવામાં આવ્યા છે. કમિશને સ્પષ્ટતા કરી છે કે ફાઇલ પ્રોસેસિંગ દરમિયાન કોઈ કમિશનર દ્વારા રજૂ કરવામાં આવેલ સૂચન કે સવાલ એ કમિશનનો આખરી નિર્ણય નથી બનતો અને ઇલેક્શન કમિશનની પારદર્શિતા સામે સવાલો ઉભા કરવા દુર્ભાગ્યપૂર્ણ છે.
