માઈક્રોસોફ્ટ કંપનીને ઓપનએઆઈ અને એન્થ્રોપિક જેવી હરીફ કંપનીઓ સામે કાંટાની ટક્કર આપવા માટે હવે કર્મચારીઓની સંખ્યા ઘટાડીને AI એજન્ટ્સ પર વધુ ભરોસો મૂકવાની જરૂર છે. માઈક્રોસોફ્ટ એન્ટ્રાના પૂર્વ પ્રોડક્ટ મેનેજર મેરિલ ફર્નાન્ડોએ દાવો કર્યો છે કે ટેક્નોલોજી ક્ષેત્રના આ જાયન્ટમાં મેનેજમેન્ટના સ્તરો અને અલગ-અલગ ટીમો વચ્ચેના અંતરાયોને કારણે નવીનીકરણની ગતિ ઘણી ધીમી પડી ગઈ છે. સોશિયલ મીડિયા પર પોતાના વિચારો રજૂ કરતા તેમણે જણાવ્યું કે માઈક્રોસોફ્ટ પાસે ગ્રાહકો, ઇન્ફ્રાસ્ટ્રક્ચર અને મોટું સ્કેલ હોવા છતાં જો તે ઝડપથી નિર્ણય નહીં લે તો પોતાની લીડ ગુમાવી દેશે. હાલમાં જ્યારે માઈક્રોસોફ્ટ દ્વારા ભારત, યુએસ, યુકે અને કેનેડામાં આશરે 60000 પાત્ર કર્મચારીઓ માટે વૉલેન્ટરી એક્ઝિટ ઓફર રજૂ કરવામાં આવી રહી છે, ત્યારે આ નિવેદને ટેક વર્તુળોમાં મોટી ચર્ચા જગાવી છે.
પૂર્વ પ્રોડક્ટ મેનેજર ફર્નાન્ડોએ પોતાના અનુભવને ટાંકીને સમજાવ્યું કે કેવી રીતે આંતરિક જટિલતાઓ ટેક્નોલોજીના અમલીકરણમાં વર્ષોના વિલંબનું કારણ બને છે. તેમણે 2017માં એન્ટ્રા ટીમ દ્વારા વિકસિત સિક્યોરિટી ફીચર મેનેજ્ડ આઈડેન્ટિટીનું ઉદાહરણ આપતા કહ્યું કે માઈક્રોસોફ્ટની અન્ય ટીમોને આ અપનાવવામાં પૂરા 6 વર્ષ લાગ્યા હતા અને તે પણ ત્યારે શક્ય બન્યું જ્યારે કંપનીને સુરક્ષા ભંગનો સામનો કરવો પડ્યો અને સિક્યોર ફ્યુચર ઇનિશિએટીવ લોન્ચ કરવો પડ્યો. તેમણે જણાવ્યું કે ઓપનએઆઈ અને એન્થ્રોપિક હાલમાં જે ગતિથી પ્રોડક્ટ્સ માર્કેટમાં લાવી રહ્યા છે, તે સ્પીડ સાથે મેચ કરવું માઈક્રોસોફ્ટ માટે મુશ્કેલ બની ગયું છે અને અસ્તિત્વ ટકાવી રાખવા માટે કંપનીએ બદલાવ કરવો જ પડશે.
ફર્નાન્ડોના મતે AI એજન્ટ્સ કંપનીના આ આંતરિક અવરોધોને દૂર કરવામાં મોટી ભૂમિકા ભજવી શકે છે, કારણ કે માનવીય સંકલન વિના લાંબી પ્રક્રિયાઓ ટૂંકા સમયમાં પૂરી કરી શકાય છે. જો કંપની AI એજન્ટ્સનો વ્યાપક ઉપયોગ કરે તો મહિનાઓની અંદર પ્રોજેક્ટ્સ પાર પાડી શકાય છે, જે વર્તમાન સમયમાં વર્ષો લે છે. જોકે માઈક્રોસોફ્ટે એવું સત્તાવાર રીતે નથી કહ્યું કે આ બાયઆઉટ ઓફર AI અપનાવવાની પ્રક્રિયાને વેગ આપવા માટે છે કે આ દ્રષ્ટિકોણ સાથે સીધી રીતે જોડાયેલી છે, પરંતુ આ બદલાવથી ટેક જગતમાં ભવિષ્યની રૂપરેખા સ્પષ્ટ થઈ રહી છે કે હવે ઓછા સ્ટાફ અને વધુ સ્માર્ટ ઓટોમેશન સાથે આગળ વધવાનો સમય આવી ગયો છે.
