ગુજરાતમાં કાયદો અને વ્યવસ્થાની સ્થિતિને વધુ મજબૂત બનાવવા તથા અસામાજિક તત્વો પર લગામ કસવા માટે ગુજરાત પોલીસ દ્વારા શરૂ કરવામાં આવેલું ઓપરેશન લંગડા અત્યારે ભારે ચર્ચામાં છે અને સુપર હિટ સાબિત થઈ રહ્યું છે. જ્યારે પણ કોઈ ગંભીર ગુનાના આરોપીઓ પોલીસ કસ્ટડીમાંથી ભાગવાનો પ્રયાસ કરે છે અથવા પોલીસ ટુકડી પર જીવલેણ હુમલો કરે છે, ત્યારે પોલીસ હવે જરાય ખચકાટ વગર આકરું વલણ અપનાવી રહી છે. પોલીસની આ ઝંઝાવાતી અને કડક કાર્યવાહીના કારણે રાજ્યના ખૂણે-ખૂણે બેફામ બનેલા ગુનેગારો અને કેફી પદાર્થોના વેપારીઓમાં પોલીસનો ડર સ્પષ્ટપણે જોવા મળી રહ્યો છે.
પોલીસ વિભાગ દ્વારા જારી કરવામાં આવેલા સત્તાવાર આંકડાઓ પર નજર કરીએ તો, છેલ્લા 2 વર્ષના ટૂંકા સમયગાળામાં પોલીસે અલગ-અલગ ગુનાહિત કેસોમાં એક્શન લેતા કુલ 21 આરોપીઓ પર ફાયરિંગ કર્યું છે. પોલીસ કસ્ટડીમાંથી ફરાર થવાની કોશિશ દરમિયાન કે સ્વબચાવના ભાગરૂપે વળતા પ્રહારમાં થયેલી આ ફાયરિંગની ઘટનાઓમાં 2 આરોપીઓના મોત પણ નીપજ્યા છે. આરોપીઓ પોલીસ પકડમાંથી છટકી ન જાય અને તેમની નાસભાગની યોજના ઘટનાસ્થળે જ નિષ્ફળ બને તે માટે ખાખી વર્દીધારીઓએ આ કડક પગલાં ભરવાની ફરજ પડી છે.
વર્ષવાર વિગતો જોઈએ તો, વર્ષ 2025 દરમિયાન પોલીસે કુલ 10 આરોપીઓ સામે સ્વબચાવમાં ફાયરિંગ કર્યું હતું, જ્યારે વર્ષ 2026 માં અત્યાર સુધીમાં કુલ 11 આરોપીઓ પર ફાયરિંગ કરીને તેમની સકંજામાં અટકાયત કરવામાં આવી છે. પોલીસની આ આક્રમક પદ્ધતિથી ગુના જગતમાં સ્પષ્ટ સંદેશ પહોંચી ગયો છે કે ગુજરાતની શાંતિ અને સુરક્ષા સાથે ચેડાં કરનારા કોઈપણ શખ્સને હવે છોડવામાં નહીં આવે. આ કડકાઈના કારણે આગામી સમયમાં ગંભીર ગુનાખોરીના આંકડાઓમાં મોટો ઘટાડો જોવા મળશે તેવી પૂરેપૂરી શક્યતા છે.
