ક્રિકેટ જગતમાં હંમેશા ચર્ચાનો વિષય રહેતી રોહિત શર્માની ફિટનેસને લઈને હવે તેના ભૂતપૂર્વ સ્ટ્રેન્થ એન્ડ કન્ડિશનિંગ કોચ સોહમ દેસાઈએ મોટો ખુલાસો કર્યો છે. વર્ષ 2027માં યોજાનાર વનડે વર્લ્ડ કપ રમવાની ઈચ્છા ધરાવતા 39 વર્ષીય રોહિત શર્મા વિશે લોકો ઘણીવાર એવું માને છે કે તે આળસુ છે અને સખત મહેનત નથી કરતો. પરંતુ સોહમ દેસાઈના જણાવ્યા મુજબ, આ વાતો બિલકુલ ખોટી છે કારણ કે રોહિતે તેની કારકિર્દીમાં શરીરની ગંભીર ઈજાઓ સામે જંગ લડીને આ સ્થાન મેળવ્યું છે. સાઉથ આફ્રિકા, ઝિમ્બાબ્વે અને નામિબિયામાં રમાનાર આગામી વર્લ્ડ કપમાં રોહિતનું રમવું તેની ફિટનેસ અને ફોર્મ પર નિર્ભર રહેશે, ત્યારે તેના ભૂતપૂર્વ કોચના આ નિવેદને બધાનું ધ્યાન ખેંચ્યું છે.
સોહમ દેસાઈએ એક પોડકાસ્ટમાં વાતચીત દરમિયાન જણાવ્યું હતું કે 2017ની ચેમ્પિયન્સ ટ્રોફીની ફાઇનલ મેચ બાદ રોહિત શર્માને હિપ અને હેમસ્ટ્રિંગની ગંભીર ઈજાઓ થઈ હતી, જે તેની કારકિર્દી માટે જોખમી સાબિત થઈ શકે તેમ હતી અને તેની સર્જરી પણ કરાવવી પડી હતી. કોચે સ્પષ્ટ કર્યું કે રોહિતનું હિપ આજે પણ તેનો સૌથી નબળોપોઈન્ટ છે અને જો તે અઠવાડિયામાં ઓછામાં ઓછા 2 સ્ટ્રેનથ સેશન ટ્રેનિંગ ન કરે તો તે ખતરાની ઘંટી સમાન બની જાય છે. છેલ્લા 7 થી 8 વર્ષથી આ જ સ્થિતિ ચાલી રહી છે. કોચે ઉમેર્યું હતું કે જો રોહિત આળસુ હોત અને મહેનત ન કરતો હોત તો તે આજના સમય સુધી આટલી લાંબી ક્રિકેટ કારકિર્દી ટકાવી ન શક્યો હોત. બીજી તરફ, ન્યૂઝીલેન્ડના ભૂતપૂર્વ અસિસ્ટન્ટ કોચ જેમ્સ પેમેન્ટે પણ રોહિત અને વિરાટ કોહલીનું સમર્થન કરતા કહ્યું છે કે આ દિગ્ગજોને 2027ના વર્લ્ડ કપમાં રમવાનો પૂરો અધિકાર છે.
રોહિત શર્મા અને વિરાટ કોહલી હવે આગામી 4 નવેમ્બરથી શરૂ થનારી ન્યૂઝીલેન્ડ સામેની 5 મેચોની વનડે સિરીઝમાં એક્શનમાં જોવા મળશે, જે આ અનુભવી ખેલાડીઓની ફિટનેસ અને ફોર્મ માટે મોટી અગ્નિપરીક્ષા સમાન રહેશે. ભારતીય ટીમ છેલ્લે 2018-19ની સિઝનમાં ન્યૂઝીલેન્ડની ધરતી પર વનડે સિરીઝ જીતી શકી હતી. આ આગામી સિરીઝ નક્કી કરશે કે આ બંને દિગ્ગજ ખેલાડીઓ ભવિષ્યની મોટી મેગા ઈવેન્ટ્સ માટે કેટલા તૈયાર છે, કારણ કે ક્રિકેટના આ સ્તરે તેમનું પ્રદર્શન અને ટીમમાં યોગદાન જ તેમનું ભવિષ્ય નક્કી કરશે.
