અમૃતસરના ચીતે કલાં ગામમાં આવેલા ગુરુદ્વારાની બહાર સોમવારે સાંજે એક હચમચાવી દેતી ઘટના સામે આવી છે, જ્યાં આમ આદમી પાર્ટીના સરપંચના ભાઈની ગોળી મારીને હત્યા કરી દેવામાં આવી છે. પ્રાપ્ત વિગતો અનુસાર મૃતક તીરથ સિંહ અને તેમનો મિત્ર રણજીત સિંહ ગુરુદ્વારામાં માથું ટેકવીને બહાર આવી રહ્યા હતા, તે દરમિયાન અચાનક હુમલાખારોએ તેમની ઉપર અંધાધૂંધ ફાયરિંગ શરૂ કરી દીધું હતું. આ ખૂની હુમલામાં ગંભીર રીતે ઘવાયેલા તીરથ સિંહને તાત્કાલિક હોસ્પિટલ ખસેડવામાં આવ્યા હતા, જ્યાં ડોક્ટરોએ તેમને મૃત જાહેર કર્યા હતા, જ્યારે તેમના મિત્ર રણજીત સિંહને પણ ગોળી વાગવાથી હાલ હોસ્પિટલમાં સારવાર આપવામાં આવી રહી છે.
આ મામલે અટારીના DSP યાદવિન્દર સિંહે જણાવ્યું હતું કે ઈજાગ્રસ્ત રણજીત સિંહની હાલત ખતરાની બહાર છે અને તેમની સારવાર ચાલી રહી છે. પ્રાથમિક તપાસમાં આ હત્યા રાજકીય રંજિશને બદલે કોઈ જૂના જમીન વિવાદનીદુશ્મનીમાંથી થઈ હોવાનું ખૂલ્યું છે. પોલીસે આ કેસમાં ગુરદિત સિંહ, ગુરજંત સિંહ, હરકીરત સિંહ ઉર્ફે હોકી અને ગોરા નામના 4 શંકાસ્પદ આરોપીઓની ઓળખ કરીને તેમની સામે એફઆઈઆર નોંધી લીધી છે, જોકે હજુ સુધી કોઈની ધરપકડ કરવામાં આવી નથી. આરોપીઓને ઝડપી પાડવા માટે ખાસ પોલીસ ટીમો બનાવવામાં આવી છે અને પીડિત પરિવાર દ્વારા પણ ગામના જ એક વિરોધી જૂથ પર શંકા વ્યક્ત કરવામાં આવી રહી છે. નોંધનીય છે કે મૃતક તીરથ સિંહના ભાઈ કરજ સિંહ AAPની ટિકિટ પર સરપંચની ચૂંટણી જીત્યા હતા.
આ ઘટના બાદ પંજાબની ભગવંત માન સરકાર સામે વિપક્ષી નેતાઓ દ્વારા સવાલો ઉભા કરવામાં આવ્યા છે અને કાયદો અને વ્યવસ્થાની સ્થિતિ સામે ગંભીર આક્ષેપો થયા છે. પૂર્વ કેન્દ્રીય મંત્રી રવનીત સિંહ બિટ્ટુએ સોશિયલ મીડિયા પર પ્રહાર કરતા જણાવ્યું હતું કે રાજ્યમાં રોજ ગોળીબારની ઘટનાઓ બની રહી છે અને જો શાસક પક્ષના પ્રતિનિધિઓ જ સુરક્ષિત ન હોય તો સામાન્ય નાગરિકોની સુરક્ષા ભગવાન ભરોસે છે. આ વધતી હિંસા અને કથળેલી કાયદો અને વ્યવસ્થા માટે મુખ્યમંત્રી જવાબદાર હોવાનું જણાવીને તેમણે સખત શબ્દોમાં ટીકા કરી છે, ત્યારે પોલીસે પણ ફરાર આરોપીઓને વહેલી તકે પકડી લેવા માટે ચક્રો ગતિમાન કર્યા છે.
