યેમનમાં ચાલી રહેલા સંઘર્ષ વચ્ચે મંગળવારે સાઉદી આગેવાની હેઠળના ગઠબંધને મોટો દાવો કર્યો છે. ઈરાન સમર્થિત હુતી જૂથ દ્વારા સાઉદી અરેબિયાના 2 અલગ-અલગ વિસ્તારોને ટાર્ગેટ કરીને બેલિસ્ટિક મિસાઈલો અને ડ્રોન છોડવામાં આવ્યા હતા. જોકે, સાઉદી સૈન્યએ સતર્કતા દાખવીને આ તમામ ખતરનાક હુમલાઓને હવામાં જ ઈન્ટરસેપ્ટ કરીને નષ્ટ કરી દીધા હતા. આ હુમલાઓને કારણે સાઉદીના સંવેદનશીલ વિસ્તારોમાં અફરાતફરીનો માહોલ સર્જાયો હતો, પરંતુ સૈન્યની સમયસૂચકતાથી મોટું નુકસાન અટકી ગયું હતું.
આ હુમલાની વિગતવાર વાત કરીએ તો, હુતી વિદ્રોહીઓએ સાઉદી અરેબિયાના પૂર્વ વિસ્તાર તરફ 3 બેલિસ્ટિક મિસાઈલ અને દેશના દક્ષિણ ભાગ તરફ 4 ડ્રોન છોડ્યા હતા. આ જોખમને ધ્યાનમાં રાખીને સાઉદી સિવિલ ડિફેન્સે પૂર્વ વિસ્તાર અને ખરજ ગવર્નરેટમાં તાત્કાલિક ધોરણે પ્રારંભિક ચેતવણીના એલર્ટ જારી કર્યા હતા. જોકે, બાદમાં સત્તાવાર રીતે એવું જાહેર કરવામાં આવ્યું હતું કે બંને વિસ્તારોમાં હવે કોઈ ખતરો નથી અને સ્થિતિ સંપૂર્ણપણે કાબૂમાં છે. આ ઘટનામાં સદભાગ્યે કોઈ જાનહાનિના અહેવાલ સામે આવ્યા નથી.
ગલ્ફ દેશોના આ વ્યૂહાત્મક વિસ્તારોમાં છેલ્લા કેટલાક સમયથી તણાવ સતત વધી રહ્યો છે. ગત મહિને હુતીઓએ યેમનના રેડ સી કોસ્ટ પાસેના વ્યૂહાત્મક વિસ્તારો કબજે કર્યા બાદ સાઉદી અરેબિયાએ આ વિદ્રોહીઓ સામે પોતાની એર સ્ટ્રાઈક વધુ તેજ કરી દીધી છે. આ નવા સંઘર્ષને કારણે વર્ષ 2022માં યુએનની મધ્યસ્થીથી થયેલું યુદ્ધવિરામ પણ ભાંગી ગયું છે, જેનાથી સમગ્ર મિડલ ઈસ્ટમાં ફરી એકવાર યુદ્ધ જેવું વાતાવરણ ઊભું થયું છે.
