વડાપ્રધાન નરેન્દ્ર મોદીએ રવિવારે ભુવનેશ્વરમાં આરબીઆઈની નવી સુવિધાઓનું ઉદ્ઘાટન કરતાં જણાવ્યું હતું કે, છેલ્લા 10 વર્ષમાં દેશના નાગરિકોને બેંકિંગ સેક્ટર સાથે જોડ્યા બાદ, હવે આવનારો દાયકો બેંકિંગ સિસ્ટમને વધુ કાર્યક્ષમ અને ભરોસાપાત્ર બનાવવાનો રહેશે. આજની આધુનિક દુનિયામાં માત્ર હથિયારોથી જ યુદ્ધ નથી લડાતા, પરંતુ કોઈ દેશની અર્થવ્યવસ્થા પર હુમલો કરીને તેને નબળો પાડવાના પ્રયાસો પણ થાય છે. ભારતીય અર્થવ્યવસ્થા જેમ-જેમ મજબૂત થઈ રહી છે, તેમ-જેમ સાયબર ક્રિમિનલ્સ અને સાયબર ટેરરિસ્ટ્સ સામે આપણી બેંકિંગ સિસ્ટમને સુરક્ષિત રાખવી અનિવાર્ય બની ગયું છે. આ માટે રોબસ્ટ ડેટા સેન્ટર્સ, એમ્પાવર્ડ કમ્પ્યુટીંગ સિસ્ટમ્સ અને ખાસ કરીને આધુનિક સાયબર સિક્યોરિટી ટ્રેનિંગ ઇન્સ્ટિટ્યુટની ભૂમિકા અત્યંત મહત્વની સાબિત થશે.
પોતાના સંબોધનમાં પીએમ મોદીએ જૂની ફોન બેંકિંગ સિસ્ટમ પર પ્રહાર કરતા કહ્યું કે તેમની સરકારે બેંકોને સાફ કરીને 'ફોન બેંકિંગ'ના યુજનો અંત લાવ્યો છે. ભૂતકાળમાં દિલ્હીના કોઈ ખાસ પરિવારની નજીક હોય તેવા ગણતરીના લોકોને જ ફોન બેંકિંગનો ફાયદો મળતો હતો, પરંતુ આજે ડિજિટલ બેંકિંગના માધ્યમથી દેશના દરેક ઘર સુધી લાભ પહોંચી રહ્યો છે. ઓડિશાની ધરતી પરથી ભૂતકાળના વડાપ્રધાન રાજીવ ગાંધીના એ નિવેદનને યાદ કરતા કે દિલ્હીથી મોકલેલા 1 રૂપિયામાંથી માત્ર 15 પૈસા જ જનતા સુધી પહોંચતા હતા, પીએમ મોદીએ જણાવ્યું કે આજે સ્થિતિ બદલાઈ ગઈ છે અને દિલ્હીથી છૂટેલો આખો 1 રૂપિયો સીધો લાભાર્થીના બેંક એકાઉન્ટમાં જમા થાય છે. નાણામંત્રી નિર્મલા સીતારમણનો ઉલ્લેખ કરીને તેમણે કહ્યું કે દેશમાં ખૂલેલા આશરે 59 થી 60 કરોડ જન ધન એકાઉન્ટ્સને કારણે આ શક્ય બન્યું છે.
છેલ્લા કેટલાક મહિનાઓમાં એસબીઆઈ સહિતની કેટલીક બેંકોમાં ડેટા સિક્યોરિટી અને ગ્રાહકો સાથે છેતરપિંડીની ઘટનાઓ સામે આવી છે ત્યારે આ નિવેદન ઘણું સૂચક છે. આ પડકારોનો સામનો કરવા માટે જૂની પદ્ધતિઓ કે જૂના ટ્રેનિંગ મોડ્યુલ કામ નહીં આવે, તેથી જ આધુનિક ઇન્ફ્રાસ્ટ્રક્ચર અને સ્કિલ્ડ હ્યુમન રિસોર્સ સમયની માંગ છે. આજે આરબીઆઈ અને બેંકિંગ સેક્ટરના પ્રયાસોના કારણે દેશના નાના ઉદ્યોગસાહસિકો, કારીગરો અને સ્ટ્રીટ વેન્ડર્સ સુધી લોનની સુવિધા પહોંચી છે તથા સામાન્ય નાગરિકો પાસે ક્રેડિટ અને ડેબિટ કાર્ડ ઉપલબ્ધ બન્યા છે, જેનાથી આગામી સમયમાં દેશનું નાણાકીય માળખું વધુ મજબૂત બનશે.
