બાંગ્લાદેશના દિનાજપુર જિલ્લામાં એક હ્રદયદ્રાવક ઘટના સામે આવી છે, જ્યાં જમીન વિવાદના મામલે બોલાવાયેલી આર્બિટ્રેશન મીટિંગ એટલે કે પંચાયત દરમિયાન મામલો ગરમાયો હતો. આ વિવાદને શાંત પાડવા અને બંને પક્ષો વચ્ચે મધ્યસ્થી કરવાનો પ્રયાસ કરી રહેલા 55 વર્ષીય હિન્દુ શિક્ષક મનોરંજન રાય પર હુમલો કરવામાં આવ્યો હતો. પોલીસના જણાવ્યા અનુસાર, રવિવારે બનેલી આ ઘટનામાં ગંભીર ઇજાઓના કારણે આ શિક્ષકનું મોત નીપજ્યું હતું, જેના કારણે સ્થાનિક વિસ્તારમાં ભારે અરેરાટી વ્યાપી ગઈ છે.
આ દુખદ ઘટના અંગે વિગતવાર માહિતી આપતા પોલીસ સૂત્રોએ જણાવ્યું કે, જમીન વિવાદને ઉકેલવા માટે યોજાયેલી આ બેઠક દરમિયાન અચાનક તણાવ વધી ગયો હતો અને વાત વણસી હતી. આ સ્થિતિમાં મનોરંજન રાયે વચ્ચે પડીને મામલો થાળે પાડવાનો પ્રયત્ન કર્યો હતો, પરંતુ ગુસ્સે ભરાયેલા શખ્સોએ તેમના પર ક્રૂરતાપૂર્વક હુમલો કર્યો અને બેરહેમીથી માર માર્યો હતો, જેના કારણે તેમનું ઘટનાસ્થળે જ મોત થયું હતું. આ બાબતે સોમવારે બાંગ્લાદેશ હિન્દુ સંમિલન સંઘ નામના લઘુમતી સંગઠને સત્તાવાર નિવેદન જારી કરીને આ નિર્દય હત્યાની આકરી નિંદા કરી છે.
આ મામલે સંગઠનના જનરલ સેક્રેટરી એમ.કે. રાયે સ્પષ્ટ શબ્દોમાં કહ્યું છે કે આ માત્ર એક ક્રિમિનલ એક્ટ નથી, પરંતુ કાયદાના શાસન, માનવતા અને બિનસાંપ્રદાયિક બાંગ્લાદેશની ભાવના પર સીધો હુમલો છે. લઘુમતી સંગઠને આ ઘટનામાં સંડોવાયેલા તમામ આરોપીઓની તાત્કાલિક ધરપકડ કરીને તેમને દાખલારૂપ સજા આપવાની માંગ કરી છે. આ સાથે જ પીડિત પરિવારને પૂરતું વળતર અને સુરક્ષા આપવા તેમજ સમગ્ર દેશમાં હિન્દુઓની જમીન કબજે કરવાની ઘટનાઓ અને અત્યાચાર અટકાવવા સરકારે અસરકારક પગલાં લેવા જોઈએ તેવી જોરદાર માંગ ઉઠાવી છે.
