દેશના નાના અને અસંગઠિત ક્ષેત્રના ઉદ્યોગોને લઈને સરકાર હવે વધુ ગંભીર બની છે અને આગામી સમયમાં ડેટા કલેક્શનની પદ્ધતિ બદલવા જઈ રહી છે. પ્રાપ્ત માહિતી અનુસાર, સરકારે વર્ષ 2027-28 માટેના એન્યુઅલ સર્વે ઓફ અનઇન્કોર્પોરેટેડ સેક્ટર એન્ટરપ્રાઇઝિસ એટલે કે ASUSE માં કેટલાક નવા અને મહત્વના સવાલો સામેલ કરવાનો પ્રસ્તાવ મૂક્યો છે. આ નવા ફેરફારો પાછળનો હેતુ દેશના નાના ઉદ્યોગોની વાસ્તવિક સ્થિતિનો તાગ મેળવવાનો અને નીતિ ઘડતર માટે વધુ સચોટ ડેટા ઉપલબ્ધ કરાવવાનો છે. આ સર્વેમાં હવે કેલેન્ડર યરને બદલે ફાઈનાન્શિયલ યર મુજબ ડેટા એકત્રિત કરવામાં આવશે, જેથી અન્ય સર્વે સાથે તેનો મેળ બેસાડી શકાય.
આ નવા પ્રસ્તાવ મુજબ, આગામી રાઉન્ડ એપ્રિલ 2027થી શરૂ થઈને માર્ચ 2028 સુધી ચાલશે. આ સર્વેના ઈતિહાસમાં પહેલીવાર એવું બનશે કે મહિલા સાહસિકો પોતાના બિઝનેસને ચલાવવામાં કયા પ્રકારની મુશ્કેલીઓનો સામનો કરે છે તેની ખાસ નોંધ લેવામાં આવશે. આ ઉપરાંત, ઉદ્યોગોમાં વીજળીના સ્ત્રોત કયા છે અને ઊર્જાનો વપરાશ કેવી રીતે થાય છે તેની પણ વિસ્તૃત માહિતી મેળવવામાં આવશે. આજના સમયની માંગ મુજબ લાંબા ગાળાના ફિક્સ્ડ એસેટ રોકાણ અને હેન્ડલૂમ, પાવરલૂમ તેમજ હસ્તકલાના એકમોને ઓળખવા માટેના ખાસ સવાલો પણ આમાં જોડવામાં આવશે.
મંત્રાલયના જણાવ્યા અનુસાર, આ બધા ફેરફારોથી દેશની અનઇન્કોર્પોરેટ્ડ ઈકોનોમી વિશેની માહિતી વધુ મજબૂત બનશે. અગાઉના સર્વે કરતા આ નવું માળખું વધુ વ્યાપક હશે અને નેશનલ એકાઉન્ટ્સના હેતુઓ માટે પણ આ ડેટા ખૂબ જ ઉપયોગી સાબિત થશે. ખાસ કરીને મહિલાઓની આર્થિક પ્રવૃત્તિઓમાં ભાગીદારી વધારવા માટે ભવિષ્યમાં બનનારી નીતિઓમાં આ સર્વેના આંકડા ખૂબ જ મહત્વપૂર્ણ ભૂમિકા ભજવશે. આ પહેલથી દેશના નાના અને ગૃહઉદ્યોગોને કઈ દિશામાં મદદની જરૂર છે તેનો સ્પષ્ટ ચિતાર સરકાર સામે આવી શકશે.
