ચેન્નાઈના વેલાચેરી વિસ્તારમાં રહેતા લોકો માટે દર ચોમાસામાં ભરાતા પાણી અને ઓવરફ્લો થતી મૈનહોલની સમસ્યા જૂની થઈ ગઈ છે. આ વિસ્તારમાં 38 કિમીના રોડ નેટવર્કમાંથી 32.6 કિમી વિસ્તારમાં સ્ટ્રોમવોટર ડ્રેઇન પાછળ 47.5 કરોડ રૂપિયાનો ખર્ચ કરવા છતાં આ લો લેયિંગ વિસ્તારમાં પાણી ભરાવાની સમસ્યા યથાવત છે. આ નીચાણવાળા વિસ્તારમાં આશરે 2 લાખ લોકો વસવાટ કરે છે, અને ડ્રેઇનેજ મેન્ટેનન્સ તથા કુદરતી જળમાર્ગોની સુરક્ષામાં રહેલી ખામીઓને કારણે પૂરનો ખતરો હંમેશા તોળાયેલો રહે છે. એજીએસ કોલોની, ભુવનેશ્વરી નગર અને રામ નગર જેવા વિસ્તારોમાં ભારે વરસાદ બાદ 2 થી 3 ફૂટ સુધી પાણી ભરાઈ જવાના અહેવાલો સામે આવે છે.
આ સમસ્યા પાછળ મુખ્યત્વે 3 મોટા કારણો જવાબદાર છે, જેમાં સૌથી મોટું કારણ ગેરકાયદે કનેક્શન્સ છે. મોટી બિલ્ડિંગો અને કોમર્શિયલ સેટઅપ દ્વારા ગટરના પાણી સીધા વરસાદી પાણીની લાઈનોમાં છોડવામાં આવે છે, જેના કારણે અંડરગ્રાઉન્ડ પાઈપલાઈનો બ્લોક થઈ જાય છે અને પાણી પાછું ફરે છે. આ ઉપરાંત, વેલાચેરી, અદામબક્કમ અને મડિપક્કમથી વહીને પલ્લિકરણાઈ માર્શ તરફ જતા 3.8 કિમી લાંબા વીરંગલ ઓડાઈ નામના કુદરતી જળમાર્ગની ઉપેક્ષા કરવામાં આવી છે, જેમાંથી માત્ર 1.5 કિમી વિસ્તારની જ યોગ્ય સફાઈ થઈ શકી છે. વળી, એક સમયે 150 એકરમાં ફેલાયેલું વેલાચેરી લેક ગેરકાયદેસર દબાણો અને પ્રદૂષણને કારણે ઘટીને માત્ર 55 એકર જેટલું જ બચ્યું છે, જેના કારણે પાણી સંગ્રહવાની ક્ષમતા ઘટી ગઈ છે.
આ ગંભીર સ્થિતિને પહોંચી વળવા માટે માત્ર ડ્રેઇન બનાવવા પૂરતા નથી પરંતુ આખી ડ્રેઇનેજ ચેઇનને સુધારવી જરૂરી છે તેમ અર્બન પ્લાનર્સ માની રહ્યા છે. કોર્પોરેશન દ્વારા ચૉકલિંગમ નગર, કલ્કી નગર અને કુબેરન નગર જેવા પ્રભાવિત વિસ્તારોમાં પાણી કાઢવા માટે 5 હેવી મોટર્સ અને 9 ટ્રેક્ટર માઉન્ટેડ મોટર્સ તૈનાત કરવામાં આવી છે. સાથે જ, વીરંગલ ઓડાઈની વહન ક્ષમતા વધારવા માટે તેની બંને બાજુએ 3.6 કિમીના પટ્ટા પર ઊંચાઈ 1 મીટર વધારવામાં આવી છે. તંત્ર દ્વારા ડ્રેઇન્સ અને કલવર્ટ્સની ડિસિલ્ટીંગ કામગીરી પણ ચાલી રહી છે જેથી ભવિષ્યમાં દરિયા તરફ પાણીનો પ્રવાહ સરળ બની શકે અને લોકોને રાહત મળે.
