જાપાનના ઓકિનાવા ટાપુ પર સ્થિત નાહા શહેરમાં બનેલી એક ચોંકાવનારી ઘટનાએ સ્થાનિક લોકો અને યુએસ મિલિટરી વચ્ચેના સંબંધોમાં ભારે તણાવ પેદા કરી દીધો છે. જાપાની અધિકારીઓએ 20 વર્ષીય યુએસ મરીન લાસ ઇન્સ્પેક્ટર ડેવિન જેકોબ બલાર્ડ સામે 39 વર્ષીય મહિલા અન્ના યાગીની હત્યા અને લૂંટનો ગંભીર આરોપ મૂકીને ઇન્ડિક્ટ કર્યા છે. ઓક્ટોબરની શરૂઆતમાં નાહાની એક હોટેલમાં અન્ના યાગીની ગળું દબાવીને હત્યા કરવામાં આવી હતી અને તેમની બેગ પણ ચોરી કરવામાં આવી હતી. આ ઘટના સામે આવતાં જ સમગ્ર જાપાનમાં લોકોનો રોષ ફાટી નીકળ્યો છે, જોકે આરોપી બલાર્ડે તમામ આરોપોને નકારી કાઢ્યા છે અને હવે આ મામલો કોર્ટની કાનૂની પ્રક્રિયામાંથી પસાર થશે.
આ સમગ્ર પ્રકરણમાં તપાસ દરમિયાન સામે આવ્યું કે સુરક્ષા કેમેરાના ફૂટેજમાં આરોપી બલાર્ડ મહિલા સાથે હોટેલમાં પ્રવેશતા અને બાદમાં એકલા જ મહિલાનો સામાન લઈને બહાર નીકળતા નજરે પડ્યા હતા. મરીન કોર્પ્સ એર સ્ટેશન ફ્યુટેમામાં ફરજ બજાવતા બલાર્ડની ઓક્ટોબરની શરૂઆતમાં જ ધરપકડ કરવામાં આવી હતી અને ત્યારબાદ સત્તાવાર ગુનાહિત આરોપો મૂકવામાં આવ્યા હતા. આ ઘટના બાદ જાપાનના વડા પ્રધાન સનાએ તાકાઇચી સહિતના દિગ્ગજ નેતાઓએ આ કથિત અપરાધની આકરી નિંદા કરી છે અને યુએસ મિલિટરી કર્મચારીઓ સામે સખત શિસ્તના પગલાં લેવાની માંગ કરી છે. મૃતક અન્ના યાગીના ભાઈએ પણ આ દુઃખદ ઘટનાથી પરિવાર પર આવેલા આફતના પહાડ વિશે વાત કરી છે અને ન્યાયની ગુહાર લગાવી છે.
આ ગંભીર ઘટના બાદ યુએસ મિલિટરી કમાન્ડર્સે તાત્કાલિક ધોરણે કડક પગલાં લેતાં સૈનિકોની પ્રવૃત્તિઓ પર અસ્થાયી રોક લગાવી છે અને શિસ્ત તાલીમ શરૂ કરી છે. અમેરિકન સૈનિકો પર રાત્રે 12:00 વાગ્યાથી સવારના 5:00 વાગ્યા સુધીનો એક મહિનાનો નાઇટ કફ્યું લાદવામાં આવ્યો છે, તેમજ બેઝ બહાર જવા અને આલ્કોહોલના સેવન પર પણ પ્રતિબંધ મૂકવામાં આવ્યો છે. જોકે ઓકિનાવાની જનતા સવાલ કરી રહી છે કે શું આવા અસ્થાયી પ્રતિબંધો ભવિષ્યના અપરાધો રોકવા માટે પૂરતા છે ખરા? નોંધનીય છે કે જાપાનના કુલ ક્ષેત્રફળના નાના હિસ્સા જેવા ઓકિનાવા ખાતે જ દેશના આશરે 70 ટકા જેટલા યુએસ મિલિટરી બેઝ આવેલા છે, જ્યાં 1995ના દુષ્કર્મના કેસથી લઈને 2024માં સામે આવેલા 80 જેટલા સૈનિકોના ધરપકડના આંકડા સુધી અગાઉ પણ અનેક વિવાદો થઈ ચૂક્યા છે. આ કથિત હત્યાકાંડે જાપાન અને યુએસ વચ્ચેની સુરક્ષા ભાગીદારી સામે ફરી એકવાર ગંભીર સવાલો ખડા કરી દીધા છે.
