આજકાલ ટેકનોલોજીની દુનિયામાં જેની ચર્ચા સૌથી વધારે છે તે એઆઈ એટલે કે આર્ટિફિશિયલ ઇન્ટેલિજન્સ પાછળ મોટી કંપનીઓ એડીચોટીનું જોર લગાવી રહી છે. આ જ રેસમાં સૌથી આગળ રહેવા માટે ગૂગલે એક મોટું જોખમ ઉઠાવ્યું છે. ગૂગલના સીઈઓ સુંદર પિચાઈએ ખુલીને સ્વીકાર્યું છે કે એઆઈ રિસર્ચને પ્રાથમિકતા આપવાને કારણે કંપનીના ક્લાઉડ બિઝનેસને શોર્ટ-ટર્મમાં મોટું નુકસાન થઈ શકે છે અથવા કમાણી ઘટી શકે છે.
વાત જાણે એમ છે કે માર્કેટમાં અત્યારે ગૂગલની ક્લાઉડ સર્વિસિસની ડિમાન્ડ આસમાને પહોંચી છે, પરંતુ કંપનીએ પોતાના મોટાભાગના કમ્પ્યુટિંગ રિસોર્સિસ એઆઈ મોડેલ્સ તૈયાર કરવા અને તેના રિસર્ચ તરફ વાળી દીધા છે. આ શક્તિશાળી એઆઈ મોડેલ્સ ચલાવવા માટે ખૂબ જ મોટા પાયે પાવર અને કમ્પ્યુટિંગ કેપેસિટીની જરૂર પડે છે. આ જ કારણ છે કે કોમર્શિયલ ક્લાયન્ટ્સ માટે પૂરતા રિસોર્સિસ ફાળવવામાં થોડી મુશ્કેલી પડી રહી છે, જેની સીધી અસર કંપનીના શોર્ટ-ટર્મ રેવન્યુ પર પડી રહી છે.
છતાંય ગૂગલના વડા સુંદર પિચાઈનું માનવું છે કે ભવિષ્ય એઆઈનું જ છે, એટલે આ લાંબા ગાળાના ફાયદા માટે ટૂંકા ગાળાના નફાની બાજી લગાડવી જરૂરી છે. કંપની ફક્ત વાતો નથી કરી રહી, પરંતુ આ મામલે ભવિષ્યની તૈયારીઓ પણ શરૂ કરી દીધી છે. ગૂગલ આગામી સમયમાં એઆઈ અને ક્લાઉડ ઇન્ફ્રાસ્ટ્રક્ચર મજબૂત બનાવવા માટે જંગી ઇન્વેસ્ટમેન્ટ કરવાની યોજના બનાવી રહ્યું છે, જેથી માર્કેટમાં તેનું જોર હંમેશા જળવાઈ રહે.
