સુરેન્દ્રનગર-રાજકોટ હાઈવે પર આવેલી મેકસન ફાર્મા ફેક્ટરી પાછળના કાચા રસ્તે ગત 23 સપ્ટેમ્બરના રોજ એસઓજી પોલીસે બાતમીના આધારે સફળ દરોડો પાડ્યો હતો. આ ઓપરેશન દરમિયાન રતનપરના સુધારા પ્લોટમાં રહેતા 25 વર્ષીય સમીર યુસુબભાઈ કટીયા નામના યુવાનને 2.24 ગ્રામ પ્રતિબંધિત એમ.ડી. ડ્રગ્સ તેમજ બે મોબાઈલ ફોન સહિત કુલ રૂપિયા 16,720 ની મુદામાલ સાથે રંગેહાથ ઝડપી લેવામાં આવ્યો હતો. આ મામલે જોરાવરનગર પોલીસ સ્ટેશનમાં એન.ડી.પી.એસ. (NDPS) એક્ટ હેઠળ ગુનો નોંધીને કાયદેસરની કાર્યવાહી હાથ ધરવામાં આવી હતી.
ઝડપાયેલા આરોપી સમીરે પોલીસ રિમાન્ડ દરમિયાન પૂછપરછમાં અનેક ચોંકાવનારા ખુલાસા કર્યા હતા, જેમાં ડ્રગ્સના નેટવર્ક અંગે મહત્ત્વની કડીઓ મળી આવી હતી. આરોપીની કડકકાઈથી પૂછપરછ કરતા તે આ પ્રતિબંધિત નશીલો પદાર્થ ચોટીલાના મંગળુ ધાંધલ નામના શખ્સને વેચાણ અર્થે આપતો હોવાનું કે તેની પાસેથી લાવતો હોવાનું સામે આવ્યું હતું. આ વિગતોના આધારે પોલીસે ચોટીલાના આ ફરાર આરોપીની સંડોવણી સ્પષ્ટ થતાં તેની સઘન શોધખોળ શરૂ કરી હતી.
પોલીસ ધરપકડથી બચવા માટે છેલ્લા કેટલાક સમયથી નાસતા ફરતા મુખ્ય કડીરૂપ આરોપી મંગળુ ધાંધલને પકડી પાડવામાં પોલીસને અંતે સફળતા મળી છે. પોલીસે ટેક્નિકલ સર્વેલન્સ અને હ્યુમન ઇન્ટેલિજન્સની મદદથી આરોપીને દબોચી લઈ વધુ તપાસ અર્થે જોરાવરનગર પોલીસ મથકના હવાલે કર્યો છે. ડ્રગ્સના આ સમગ્ર નેટવર્કમાં કયા કયા અન્ય લોકો સંડોવાયેલા છે અને આ રેકેટના તાર ક્યાં સુધી ફેલાયેલા છે તે અંગે પોલીસ ઊંડાણપૂર્વક તપાસ ચલાવી રહી છે.
