વડાપ્રધાન નરેન્દ્ર મોદીએ શનિવારે લખનઉ ખાતે પાંચમા રાષ્ટ્રીય કૌશલ્ય દીક્ષાંત સમારોહને સંબોધિત કરતા સોનાની ખરીદી અને તેના ઘટતા ભાવો અંગે મોટું નિવેદન આપ્યું હતું. તેમણે ખુલાસો કર્યો કે લગભગ એક વર્ષ અગાઉ તેમણે દેશવાસીઓને અપીલ કરી હતી કે જો ખૂબ જ અનિવાર્ય ન હોય તો એક વર્ષ સુધી સોનું ન ખરીદવું. શરૂઆતમાં ભલે ઘણા લોકોએ આ વાતની મજાક ઉડાવી હતી, પરંતુ દેશના નાગરિકોએ તેમની આ સલાહને ગંભીરતાથી અપનાવીને સોનાની ખરીદીમાં ઘટાડો કર્યો. પરિણામે, બજારમાં સોનાના ભાવોમાં નોંધપાત્ર ઘટાડો જોવા મળ્યો છે અને આજે નાગરિકો કહી રહ્યા છે કે મોદીજીની આ સૂઝબૂઝભરી સલાહથી તેમના નાણાંની બચત થઈ છે.
આ સંબોધન દરમિયાન વડાપ્રધાને દેશની શિક્ષણ પદ્ધતિ અને ઐતિહાસિક પૃષ્ઠભૂમિ પર પણ પ્રકાશ પાડ્યો હતો. તેમણે જણાવ્યું હતું કે ભૂતકાળમાં જ્યારે વિદેશી આક્રમણકારો ભારત આવ્યા ત્યારે તેમણે દેશની આર્થિક સમૃદ્ધિની સાથે અહીંના કારીગરોના હસ્તકૌશલ્ય અને કુશળતાને નષ્ટ કરવાના કુટિલ પ્રયાસો કર્યા હતા. આક્રમણકારો જાણતા હતા કે ભારતની અસલી તાકાત તેની કુશળતામાં છુપાયેલી છે. ત્યારબાદ અંગ્રેજોએ મેકોલે શિક્ષણ પ્રણાલી દ્વારા દેશમાં કૌશલ્ય આધારિત વ્યવસ્થાને નબળી પાડીને માત્ર કાગળ પર કામ કરતા ક્લાર્ક તૈયાર કરવાનું કામ શરૂ કર્યું, જેના કારણે સમાજમાં શ્રમ અને કૌશલ્યના સન્માનની ભાવના ઘટી ગઈ હતી.
દેશના યુવાનો અને તેમના કૌશલ્ય વિકાસને પ્રોત્સાહન આપવા માટે વડાપ્રધાને આઈઆઈટી (IIT) અને આઈટીઆઈ (ITI) વચ્ચેનો ભેદભાવ મિટાવવા ઉપર ભાર મૂક્યો હતો. તેમણે સ્પષ્ટ શબ્દોમાં કહ્યું કે તેમના માટે આઈઆઈટી હોય કે આઈટીઆઈ, બંને દેશની અસલી સંપત્તિ અને ભવિષ્ય છે. ભૂતકાળમાં સમાજમાં એવી માનસિકતા બની ગઈ હતી કે આઈટીઆઈમાં પ્રવેશ મેળવનાર વિદ્યાર્થીઓના વાલીઓ સંબંધીઓને જણાવવામાં સંકોચ અનુભવતા હતા, પરંતુ આ પરિસ્થિતિ બદલવાનો સંકલ્પ લેવાયો છે. વડાપ્રધાને ખાતરી આપી હતી કે આઈઆઈટીના વિદ્યાર્થીઓને જેટલું સન્માન મળે છે, તેટલું જ સન્માન હવે આઈટીઆઈના યુવા વિદ્યાર્થીઓને પણ અપાવવામાં આવશે જેથી વિકસિત ભારતના નિર્માણમાં તેમનું કૌશલ્ય મહત્ત્વપૂર્ણ ઊર્જા બની શકે.
