JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
ક્રાઈમ

ઇસ્કોન બ્રિજ અકસ્માત કેસમાં નવો વળાંક: તથ્ય પટેલના પાંચ મિત્રો કોર્ટમાં ફરી ગયા

ઇસ્કોન બ્રિજ અકસ્માત કેસમાં નવો વળાંક: તથ્ય પટેલના પાંચ મિત્રો કોર્ટમાં ફરી ગયા
અમદાવાદના ચકચારી ઇસ્કોન બ્રિજ અકસ્માત કેસમાં મુખ્ય આરોપી તથ્ય પટેલ સામેની ટ્રાયલ દરમિયાન તેની કારમાં સવાર પાંચેય મિત્રો ઝડપના મુદ્દે હોસ્ટાઇલ જાહેર થયા છે. જોકે, વૈજ્ઞાનિક પુરાવા અને ટેકનિકલ ડેટા મજબૂત હોવાથી આ કેસ પર કોઈ મોટી અસર નહીં પડે.

અમદાવાદના કુખ્યાત ઇસ્કોન બ્રિજ અકસ્માત કેસમાં ચાલી રહેલી કાનૂની કાર્યવાહીમાં એક મોટો અને ચોંકાવનારો વળાંક સામે આવ્યો છે. અકસ્માત સર્જાયો તે સમયે મુખ્ય આરોપી તથ્ય પટેલની જેગુઆર કારમાં સવાર તેના પાંચેય મિત્રો માલવિકા પટેલ, શાન સોની, ધ્વનિ પંચાલ, આર્યન પંચાલ અને શ્રેયા પટેલ કોર્ટમાં ટ્રાયલ દરમિયાન પોતાના અગાઉના નિવેદનથી ફરી ગયા છે અને હોસ્ટાઇલ જાહેર થયા છે. અગાઉ આ તમામ સાક્ષીઓએ સીઆરપીસીની કલમ 164 હેઠળ મેજિસ્ટ્રેટ સમક્ષ એવું નિવેદન નોંધાવ્યું હતું કે, અકસ્માતની રાત્રે તથ્ય અત્યંત પૂરઝડપે ગાડી ચલાવી રહ્યો હતો અને તેમણે વારંવાર કાર ધીમી રાખવા માટે ટાઢા પહોંચાડવા છતાં તેણે કોઈ વાત સાંભળી ન હતી. પરંતુ હવે કોર્ટમાં આ સાક્ષીઓ કારની સ્પીડના મુદ્દે યુ-ટર્ન લઈ ચૂક્યા છે.

આ પાંચેય સાક્ષીઓ પોતાના નિવેદનોથી ફરી ગયા હોવા છતાં, કાનૂની નિષ્ણાતોના મતે કેસમાં કારની સ્પીડ સાબિત કરવાનો મુદ્દો નબળો પડવાની શક્યતાઓ નહિવત સમાન છે. આ દુર્ઘટના પાછળના મુખ્ય કારણો અને હકીકતોને સાબિત કરવા માટે પ્રોસિક્યુશન પાસે અત્યંત મજબૂત વૈજ્ઞાનિક અને ટેકનિકલ પુરાવા ઉપલબ્ધ છે. ઘટનાસ્થળે પસાર થઈ રહેલા એક બાઈકચાલકના કેમેરામાં આ ભયાનક અકસ્માત ફ્રેમ-ટુ-ફ્રેમ કેદ થઈ ગયો હતો, જેની બારીકાઈથી કરવામાં આવેલી ફોરેન્સિક તપાસ દ્વારા વાહનની ચોક્કસ ગતિ નક્કી કરવામાં આવી છે. આ ઉપરાંત એફએસએલ (FSL), આરટીઓ (RTO) અને કાર બનાવનાર કંપનીના ટેકનિકલ ડેટા તેમજ એન્ટી-બ્રેકિંગ સિસ્ટમની ઊંડાણપૂર્વકની તપાસમાં એ સ્પષ્ટ થઈ ચૂક્યું છે કે અકસ્માત સમયે જેગુઆર કાર આશરે ૧૪૦ કિમી પ્રતિ કલાકની ભયજનક ઝડપે દોડી રહી હતી.

ઉલ્લેખનીય છે કે 19મી જુલાઈ 2023ની મોડી રાત્રે અર્થાત 20મી જુલાઈના રોજ ઇસ્કોન બ્રિજ પર બનેલી આ ગોઝારી ઘટનાએ સમગ્ર દેશમાં હડકંપ મચાવી દીધો હતો, જેમાં તથ્ય પટેલે બેફામ ઝડપે દોડતી કાર નિર્દોષ લોકો પર ચડાવી દેતા 9 જેટલા નાગરિકોના કમકમાટીભર્યા મોત નીપજ્યા હતા. આ ગંભીર ગુના બદલ તથ્ય પટેલને લાંબો સમય સાબરમતી મધ્યસ્થ જેલમાં વિતાવવો પડ્યો હતો અને પોણા ત્રણ વર્ષના લાંબા સમયગાળા બાદ સુપ્રીમ કોર્ટે તેને જામીન મંજૂર કર્યા હતા. હાલ અમદાવાદ ગ્રામ્ય સેશન્સ કોર્ટમાં ચાલી રહેલી આ ટ્રાયલમાં પ્રત્યક્ષદર્શી સાક્ષીઓની જુબાનીઓ ભલે બદલાઈ ગઈ હોય, પરંતુ અકસ્માતના આ કેસમાં ટેકનિકલ અને સાયન્ટિફિક પુરાવા જ ન્યાય અપાવવા માટેનો સૌથી મોટો અને નિર્ણાયક આધાર બનશે.

ક્રાઈમ વિભાગના વધુ સમાચાર

LATEST ARTICLES