અમરેલી જિલ્લાના રાજુલા શહેરમાં ટ્રાફિકના નિયમો અને કાયદાની ધજાગરા ઉડાડતા વાહનચાલકો સામે પોલીસ દ્વારા સઘન ચેકિંગ અને પેટ્રોલીંગ હાથ ધરવામાં આવી રહ્યું છે. તાજેતરમાં રાજુલા પોલીસ સ્ટેશનનો સ્ટાફ વિસ્તારમાં નાઈટ પેટ્રોલીંગમાં હતો, તે દરમિયાન બસ સ્ટેશનથી કોહીનુર વિસ્તાર તરફ એક શંકાસ્પદ બુલેટ ચાલક પૂરપાટ ઝડપે પસાર થઈ રહ્યો હતો. આ બુલેટમાં નિયમો વિરુદ્ધનું મોડીફાય કરેલું અત્યંત ઉંચા અવાજ કરતું સાયલેન્સર અને આકર્ષક ફેન્સી એલ.ઇ.ડી. લાઈટો ફીટ કરવામાં આવી હતી, જે આસપાસના નાગરિકો માટે પણ પરેશાનીરૂપ સાબિત થઈ રહી હતી.
પોલીસ ટીમે ત્વરિત કાર્યવાહી કરીને આ મોટરસાઇકલને અટકાવી હતી અને વાહનના દસ્તાવેજોની ચકાસણી હાથ ધરી હતી. તપાસ દરમિયાન ચોંકાવનારી વિગતો સામે આવી હતી કે બુલેટ ચલાવનાર યુવક પાસે વાહન ચલાવવા માટેનું અધિકૃત ડ્રાઇવિંગ લાયસન્સ પણ નહોતું અને એટલું જ નહીં, બાઈક પર આગળ કે પાછળ કોઈ નંબર પ્લેટ પણ લગાવવામાં આવી નહોતી. મૂળ ધારી તાલુકાના પાદરગઢ ગામનો વતની અને હાલ અમદાવાદના નિકોલ વિસ્તારમાં રહેતો યુવરાજભાઈ જગુભાઈ વાળા નામનો આ યુવાન બેફામપણે બેજવાબદાર બનીને વાહન ચલાવી રહ્યો હોવાનું સ્પષ્ટ થયું હતું.
આ ગંભીર બેદરકારી અને ટ્રાફિક નિયમોના ભંગ બદલ રાજુલા પોલીસે તાત્કાલિક ધોરણે બુલેટ કબ્જે કરીને વાહનચાલક યુવરાજ વિરુદ્ધ ભારતીય ન્યાય સંહિતા (BNS) તેમજ મોટર વ્હીકલ એક્ટ (MV Act) ની સંબંધિત કલમો હેઠળ ગુનો નોંધીને કાયદેસરની કડક કાર્યવાહી હાથ ધરી છે. પોલીસની આ લાભદાયી અને કડક કામગીરીથી શહેરમાં નિયમોનું ઉલ્લંઘન કરતા અન્યો તત્વોમાં પણ મોટો ફફડાટ ફેલાઈ ગયો છે.
