રાજકોટના કારડિયા રાજપૂત સમાજમાં છેલ્લા કેટલાક સમયથી આંતરિક અસંતોષ અને વિવાદ સપાટી પર આવી રહ્યો છે, જેના કેન્દ્રમાં સુરેન્દ્રનગરમાં બની રહેલું ભવાનીધામ છે. આ ભવાનીધામના નિર્માણ અને તેના આયોજનને લઈને સમાજના દિગ્ગજ આગેવાનો પૂર્વ સાંસદ દીનુ સોલંકી અને વિક્રમસિંહ પરમાર વચ્ચે તીખા શાબ્દિક પ્રહારો શરૂ થયા છે. આ બંને નેતાઓ વચ્ચે ચાલી રહેલા આ વાગયુદ્ધને કારણે સમગ્ર સમાજમાં ભારે ચર્ચા જાગી છે અને આંતરિક એકતા સામે સવાલો ઉભા થઈ રહ્યા છે. પરિસ્થિતિ વણસતી જોઈને સમાજના આગેવાનો દ્વારા અંદરોઅંદરના મતભેદો મટાડીને એકતા જાળવી રાખવાના પ્રયાસો હાથ ધરવામાં આવ્યા છે.
આ સમગ્ર ઘટનાક્રમ વચ્ચે કારડિયા રાજપૂત સમાજ, રાજકોટના પ્રમુખ મહેશ રાજપૂતે આગળ આવીને સમાજને શાંતિ જાળવવાનો સંદેશ આપ્યો છે. તેમણે સ્પષ્ટ શબ્દોમાં જણાવ્યું હતું કે ભવાનીધામના નિર્માણથી સમાજ માટે અનેક હકારાત્મક અને રચનાત્મક કાર્યો થઈ શકશે, તેથી વ્યક્તિગત અહેમ કે આમંત્રણ ન મળવાના કારણે સમાજના કાર્યોને અટકાવવા યોગ્ય નથી. મહેશ રાજપૂતે દીનુ સોલંકી અને વિક્રમસિંહ પરમાર બંનેને પોતાના નિવેદનો પર સંયમ રાખવા ટકોર કરી હતી. તેમણે ઉમેર્યું હતું કે સાર્વજનિક પ્લેટફોર્મ પરથી બોલતી વખતે વિશેષ ધ્યાન રાખવું જરૂરી છે જેથી કોઈ ઉશ્કેરણીજનક નિવેદનથી સમાજની પ્રતિષ્ઠાને આંચ ન આવે. તેમણે બંને નેતાઓને સાથે બેસીને પોતાના તમામ મનભેદો ઉકેલી લેવાની સલાહ આપી હતી.
બીજી બાજુ, દીનુ સોલંકી અને વિક્રમસિંહ પરમાર વચ્ચેના આ વાદ-વિવાદે આગમાં ઘી હોમવાનું કામ કર્યું છે. દીનુ સોલંકીએ નામ લીધા વિના સુરેન્દ્રનગર અને અમદાવાદથી આવતા લોકો પર સમાજમાં ભાગલા પાડવાનો ગંભીર આરોપ મૂકતા કોડીનારમાં ખુલ્લો પડકાર ફેંક્યો હતો. તો સામે પક્ષે, મુખ્ય આયોજક તરીકે જાણીતા વિક્રમસિંહ પરમારે પણ આકરા પ્રહાર કરતા જણાવ્યું હતું કે સત્કાર્યો કરતી વખતે આવા વિવાદો અને વિરોધો પર ધ્યાન ન દેવું જોઈએ. આ તમામ તંગદિલી વચ્ચે મહેશ રાજપૂતે સમાજહિતને સર્વોપરી ગણીને કોઈપણ સંજોગોમાં સત્કાર્યો અટકાવા ન જોઈએ તેવો મજબૂત મત વ્યક્ત કર્યો છે.
