સુરેન્દ્રનગર જિલ્લામાં કુદરતી સંપત્તિની બેફામ લૂંટ ચલાવતા ખનન માફિયાઓ સામે જિલ્લા પોલીસ વડા અને ઉચ્ચ અધિકારીઓના માર્ગદર્શન હેઠળ લાલ આંખ કરવામાં આવી છે. તાજેતરમાં રાજકોટ રેન્જ આઈજી નિર્લિપ્ત રાય અને જિલ્લા પોલીસ વડા પ્રેમસુખ ડેલુની સૂચનાના આધારે લીંબડી પોલીસ દ્વારા ગેરકાયદે પ્રવૃત્તિઓ ડામવા માટે વિશેષ ઝુંબેશ હાથ ધરવામાં આવી છે. આ જ ક્રમમાં લીંબડી પોલીસ ઇન્સ્પેક્ટર જી. બી. પરમારની આગેવાની હેઠળ પોલીસ ટીમ દ્વારા શિયાણી ગામની ખારી સીમ વિસ્તારમાં અણધારી રેડ પાડવામાં આવી હતી, જ્યાં નદી કે અન્ય સ્ત્રોતોમાંથી ગેરકાયદે રેતી ચોરી કરી તેને વોશ કરવાનો મોટો ધંધો ચાલી રહ્યો હતો.
પોલીસની આ ઓચિંતી અને આક્રમક કાર્યવાહીથી પંથકમાં ગેરકાયદે ખનનનું નેટવર્ક ચલાવતા તત્વોમાં ભારે નાસભાગ મચી ગઈ હતી. સ્થળ પર તપાસ હાથ ધરતા ખબર પડી કે અહીં ગેરકાયદેસર રીતે રેતીનું ઉત્ખનન કરી તેને ધોઈને બજારમાં વેચવાનું કારસ્તાન લાંબા સમયથી ધમધમી રહ્યું હતું. પોલીસ ટીમે સ્થળ પરથી ગેરકાયદે ખનન અને પરિવહન માટે ઉપયોગમાં લેવાતા ભારે વાહનો અને મશીનરી કબજે લીધી હતી. આ દરોડા દરમિયાન ખાણ-ખનિજ વિભાગની ટીમ પણ તાત્કાલિક ઘટનાસ્થળે દોડી આવી હતી અને પોલીસે સંયુક્ત રીતે તપાસનો ધમધમાટ શરૂ કર્યો હતો.
આ મેગા રેડ દરમિયાન પોલીસે ડમ્પર, લોડર, જનરેટર મશીન તેમજ મોટી માત્રામાં રેતી અને અન્ય ખનિજનો જથ્થો જપ્ત કર્યો છે, જેની કુલ અંદાજિત કિંમત રૂપિયા ૧૫ લાખ જેટલી થાય છે. પોલીસ અને ખાણ-ખનિજ વિભાગની આ સંયુક્ત લાલ આંખથી સમગ્ર વિસ્તારના ખનન માફિયાઓમાં મોટો ખળભળાટ વ્યાપી ગયો છે. હાલ તંત્ર દ્વારા આ ગેરકાયદે કારોબારમાં પ્રત્યક્ષ કે અપ્રત્યક્ષ રીતે સંડોવાયેલા અન્ય શખ્સોની પણ કડક પૂછપરછ હાથ ધરવામાં આવી છે, જેથી આ રેકેટ પાછળ સક્રિય મોટા માથાઓનો પણ પર્દાફાશ કરી શકાય અને કાયદાકીય શિસ્ત સ્થાપિત થઈ શકે.
