પંજાબ વિધાનસભા ચૂંટણીને હવે એક વર્ષથી પણ ઓછો સમય બાકી છે ત્યારે મુખ્યમંત્રી ભગવંત માનની સરકારે સમાજના વિવિધ વર્ગો સુધી પહોંચ વધારવા માટે આક્રમક રણનીતિ અપનાવી છે. સરકારે મહિલાઓ, યુવાનો, ખેડૂતો, વીજળી ગ્રાહકો અને વરિષ્ઠ નાગરિકોને ધ્યાનમાં રાખીને અનેક લોકઉપયોગી યોજનાઓ જાહેર કરી છે. આ વ્યુહરચના પાછળનો મુખ્ય ઉદ્દેશ્ય નાણાકીય રાહત, યુવા સશક્તિકરણ અને જાહેર માળખાકીય સુવિધાઓના આધારે એક મજબૂત રાજકીય પાયો બનાવવાનો છે. આ કડીમાં મુખ્યમંત્રી ભગવંત માન દ્વારા તાજેતરમાં શરૂ કરવામાં આવેલી 'પંજાબ દા કરોડપતિ' રાજ્યવ્યાપી યુવા ક્વિઝ સ્પર્ધા વિશેષ આકર્ષણનું કેન્દ્ર બની છે, જેમાં એક કરોડ રૂપિયાનું ભવ્ય ઇનામ રાખવામાં આવ્યું છે.
આ અભિયાન માત્ર શૈક્ષણિક કે મનોરંજન પૂરતું સીમિત નથી, પરંતુ તે યુવાનોને પંજાબના ઇતિહાસ, સંસ્કૃતિ અને સરકારી નોકરીઓની તૈયારી સાથે જોડવાનો એક રાજકીય પ્રયાસ પણ છે. યુવાનોને જોડવા માટે સરકારે 'પેંડુ ખેડ મૈદાન' પહેલ હેઠળ ગ્રામીણ સ્તરે ૧,૦૦૦ નવા રમતગમતના મેદાનોનું લોકકાર્પણ કર્યું છે, જેથી ડ્રગ્સની સમસ્યા સામે રમતગમત દ્વારા યુવા પેઢીને બચાવી શકાય. બીજી તરફ, મહિલાઓ માટે શરૂ કરાયેલી 'મુખ્યમંત્રી માવાં-ધીયાં સત્કાર યોજના' હેઠળ પાત્ર મહિલાઓને દર મહિને ૧,૦૦૦ રૂપિયા અને અનુસૂચિત જાતિની મહિલાઓને ૧,૫00 રૂપિયાની સીધી આર્થિક સહાય આપવામાં આવી રહી છે, જેનો લાભ લાખો મહિલાઓ મેળવી રહી છે. આ ઉપરાંત, વરિષ્ઠ નાગરિકો માટે 'મુખ્યમંત્રી તીર્થયાત્રા યોજના' અને ઘરેલુ વીજળી ગ્રાહકો માટે 'વન ટાઈમ સેટલમેન્ટ' (OTS) જેવી યોજનાઓ દ્વારા સરકારે દરેક પરિવાર સુધી પોતાની ઉપસ્થિતિ નોંધાવી છે.
જો કે, આ તમામ લોકકલ્યાણકારી યોજનાઓ વચ્ચે વિપક્ષો દ્વારા તેની સમયસાપેક્ષતા અને નાણાકીય અસરો પર સવાલો પણ ઉઠાવવામાં આવી રહ્યા છે. પંજાબ સામે બેરોજગારી, દેવું અને કાયદો-વ્યવસ્થા જેવા ગંભીર પડકારો હજુ પણ યથાવત છે, ત્યારે માત્ર જાહેરાતોથી મતદારો કેટલા પ્રભાવિત થાય છે તે સમય જ કહેશે. આમ છતાં, આગામી ૨૦૨૭ની ચૂંટણીના પરિપ્રેક્ષ્યમાં ભગવંત માન સરકારે સીધા લાભ અને જમીની સ્તરની સગવડોને પોતાની રાજકીય ઝુંબેશના કેન્દ્રમાં મૂકીને એક મોટો રાજકીય જુગાર રમ્યો છે, જેનું ભવિષ્ય ચૂંટણીના પરિણામો જ નક્કી કરશે.
