નવા વર્ષના પ્રારંભે અને લાભપાંચમના પાવન અવસરે જામનગરનાં લોકપ્રિય સાંસદ પૂનમ માડમ દ્વારા એક અનોખી શૈલી જોવા મળી હતી. તેઓ જામનગર સ્થિત પોતાના નિવાસસ્થાનેથી રવાના થઈને કોઈ સરકારી કે અન્ય વાહનને બદલે પોતાની ખાનગી 'જીપ રૂબિકોન' કાર જાતે જ ડ્રાઈવ કરીને દ્વારકા પહોંચ્યા હતા. લાંબા અંતરની આ સફર દરમિયાન તેમણે રસ્તામાં આવતા વિવિધ ગામોની મુલાકાત લીધી હતી અને સ્થાનિક ગ્રામજનો તેમજ નાગરિકો સાથે રૂબરૂ મળીને તેમને નવા વર્ષની હાર્દિક શુભેચ્છાઓ પાઠવી હતી. જનપ્રતિનિધિની આ સરળ અને સહજ શૈલીએ લોકોમાં ભારે આકર્ષણ જગાવ્યું હતું.
દ્વારકા પહોંચ્યા બાદ સાંસદ પૂનમ માડમે જગતમંદિરમાં પ્રભુ સમક્ષ નતમસ્તક થઈને દ્વારકાધીશનાં દર્શન કર્યા હતા અને વિધિવત પૂજા-અર્ચના કરી હતી. દર્શન કર્યા પછી મીડિયા સાથે વાતચીત કરતા તેમણે જણાવ્યું હતું કે દ્વારકા તેમના માટે માત્ર એક પ્રવાસન સ્થળ નથી, પરંતુ તેમનું તીર્થધામ અને આરાધ્ય દેવ, ઇષ્ટદેવ તથા કુળદેવતા દ્વારકાધીશની પવિત્ર ભૂમિ છે. નવા વર્ષની શરૂઆત થતાની સાથે જ જગતમંદિરની મુલાકાત લેવાની અને દર્શન કરવાની પોતાની પરંપરા તેઓ વર્ષોથી નિભાવતા આવ્યા છે. તેમણે ઉમેર્યું હતું કે ગોમતી નદીના કિનારે બેસવાથી અને જગતમંદિર પર લહેરાતી ભવ્ય ધર્મધજાના દર્શન માત્રથી તેમને અદ્ભુત શાંતિ અને આધ્યાત્મિક ઊર્જાની પ્રાપ્તિ થાય છે.
આ આધ્યાત્મિક યાત્રા દરમિયાન તેમણે માત્ર પોતાની કે પરિવારની નહીં, પરંતુ સમગ્ર જામનગર, દ્વારકા અને દેશભરના નાગરિકોની સુખાકારી માટે ચિંતા વ્યક્ત કરી હતી. તેમણે ભગવાન દ્વારકાધીશના ચરણોમાં પ્રાર્થના કરી હતી કે આવનારા દિવસોમાં લોકોનું સ્વાસ્થ્ય ઉત્તમ રહે અને સમાજમાં સુખ, શાંતિ તેમજ સમૃદ્ધિ જળવાઈ રહે. આ સાથે જ તેમણે આગામી સમયમાં સંભવિત દુષ્કાળની સ્થિતિના એંધાણ વર્ણવતા કહ્યું હતું કે જો આ પ્રકારના કુદરતી કે આબોહવાકીય પડકારો ઊભા થાય, તો જામનગર અને દ્વારકા જિલ્લાના લોકોને તેનો મક્કમતાથી સામનો કરવાની પરમ શક્તિ ઈશ્વર પ્રદાન કરે તેવી વિશેષ પ્રાર્થના પણ તેમણે કરી હતી.
