દેશના વાયદા બજારમાં આજે કિંમતી ધાતુઓની ચાલમાં જોરદાર તેજીનો વરતારો જોવા મળ્યો છે, જેના કારણે રોકાણકારો અને વેપારીઓમાં ભારે ઉત્સાહ ફેલાયો છે. વૈશ્વિક બજારોમાંથી પ્રાપ્ત થઈ રહેલા ઉત્સાહજનક સંકેતો તેમજ સ્થાનિક જ્વેલરી બજારમાં નીકળેલી નવી લેવાલીને પગલે એમસીએક્સ (MCX) માર્કેટમાં સોના અને ચાંદીના ભાવ નવી ઊંચાઈઓ સર કરી રહ્યા છે. ખાસ કરીને લગ્નની સિઝન અને કિંમતી ધાતુઓમાં સુરક્ષિત રોકાણ પ્રત્યે વધતા આકર્ષણને કારણે બજારમાં સતત ખરીદીનું જોર જળવાઈ રહ્યું છે, જેના સીધા પરિણામરૂપ ભાવમાં આ મોટો ઉછાળો નોંધાયો છે.
આજના કારોબારી સત્રની શરૂઆતમાં જ સોનાના ભાવમાં સાર્વત્રિક ખરીદી નીકળતા નવો ઓપનિંગ ભાવ રૂ. 1,41,270 ના સ્તરે ખૂલ્યો હતો, જે અગાઉના રૂ. 1,40,525 ના બંધ ભાવની સરખામણીએ મોટો સુધારો દર્શાવે છે. દિવસના કાળોબાર દરમિયાન સોનાએ રૂ. 1,41,568 ની સર્વોચ્ચ સપાટીને સ્પર્શ કર્યો હતો અને નીચલા સ્તરે રૂ. 1,41,255 નો વેપાર નોંધાવ્યો હતો. આ સાથે જ કારોબારની શરૂઆતમાં જ સોનાના ભાવમાં કુલ રૂ. 1,043 નો મજબૂત વધારો નોંધાતા ગ્રાહકોનું બજેટ થોડું ડામાડોળ બન્યું છે, પરંતુ રોકાણકારો માટે આ સ્થિતિ અત્યંત ફાયદાકારક સાબિત થઈ રહી છે.
બીજી તરફ, ચાંદીના બજારમાં રોકેટ ગતિની તેજી જોવા મળી હતી જેણે સૌકોઈનું ધ્યાન ખેંચ્યું છે. અગાઉના રૂ. 1,82,576 ના બંધ ભાવ સામે ચાંદી આજે સીધી જ રૂ. 1,85,414 ના મજબૂત સ્તરે ખૂલી હતી અને ભારે લેવાલીને કારણે રૂ. 1,86,201 ની ઓલટાઈમ હાઈ સપાટી પર પહોંચી ગઈ હતી. દિવસ દરમિયાન ચાંદીનો નીચલો સ્તર રૂ. 1,85,290 રહ્યો હતો અને એક જ દિવસમાં તેમાં રૂ. 3,625 નો ધરખમ વધારો નોંધાયો હતો. ચાંદીમાં આવેલા આ અણધાર્યા અને ઝડપી ઉછાળાને કારણે બજારમાં ભારે હલચલ મચી ગઈ છે અને આગામી દિવસોમાં પણ આ તેજીનો સિલસિલો જળવાઈ રહેવાની સંભાવના વ્યક્ત કરવામાં આવી રહી છે.
