ગીર સોમનાથ જિલ્લાના ગ્રામીણ વિસ્તારોમાં વન્યજીવો અને ખાસ કરીને સાવજોની અવારનવાર થતી અવરજવર વચ્ચે વધુ એક વખત માનવ વસ્તીમાં સિંહો ઘૂસી આવ્યા હોવાની ચિંતાજનક ઘટના પ્રકાશમાં આવી છે. વેરાવળ તાલુકાના ખંઢેરી ગામમાં મોડી રાત્રિના સુમારે આખો સિંહ પરિવાર નિર્ભયપણે લટાર મારતો જોવા મળ્યો હતો. ગામની શેરીઓમાં અચાનક સિંહો આવી ચડતા આસપાસના રહેવાસીઓમાં ભારે ફફડાટ વ્યાપી ગયો હતો. રાત્રિના અંધકારમાં સાવજોની ડણક સંભળાતા જ ગામમાં સન્નાટો છવાઈ ગયો હતો અને સ્થાનિકોએ આ અદભુત પરંતુ જોખમી દ્રશ્ય પોતાના કેમેરામાં કેદ કરી લીધું હતું, જે હાલ સોશિયલ મીડિયામાં જોરદાર વાયરલ થઈ રહ્યું છે.
શિકાર અને પાણીની શોધમાં રહેણાંક વિસ્તાર તરફ વળેલા આ સિંહ પરિવારની ગંધ પારખી જતાં ગામમાં બાંધેલા પશુઓ અને કૂતરાઓમાં ભારે અફરાતફરી અને નાસભાગ મચી ગઈ હતી. સ્થાનિક લોકોના જણાવ્યા અનુસાર, ખંઢેરી તેમજ તેની આસપાસના સીમ વિસ્તારોમાં લાંબા સમયથી સિંહોએ કાયમી ડેરા નાખ્યા છે, પરંતુ હવે તેઓ અવારનવાર માનવ વસ્તીની નિકટ આવી રહ્યા છે. રાત્રિના સમયે ખેતરોમાં પિયત કરવા જતા ખેડૂતો અને માલધારીઓ માટે આ સ્થિતિ જીવનું મોટું જોખમ બની ગઈ છે. અચાનક ગમે ત્યારે સિંહ સામે આવી જવાની દહેશતના કારણે ખેડૂતો રાત્રે પોતાના ખેતરે જતા પણ ડરી રહ્યા છે, જેના કારણે તેમની દૈનિક દિનચર્યા અને ખેતીકામ પર પણ માઠી અસર પડી રહી છે.
આ ગંભીર પરિસ્થિતિને ધ્યાનમાં રાખીને ગ્રામજનો દ્વારા ગીર સોમનાથ વનવિભાગને તાત્કાલિક ધોરણે લેખિત તેમજૌ મૌખિક રજૂઆતો કરવામાં આવી છે. ગામલોકોની મુખ્ય માંગ છે કે વનવિભાગ દ્વારા ગામની આસપાસના વિસ્તારમાં નિયમિત નાઈટ પેટ્રોલિંગ વધારવામાં આવે. આ ઉપરાંત, માનવ વસ્તી તરફ ધસી આવતા સિંહોને સુરક્ષિત જંગલ કે સીમ વિસ્તાર તરફ પાછા ખદેડવા માટે યોગ્ય સ્થળોએ પાંજરા ગોઠવવામાં આવે તેવી પણ ઉગ્ર માંગણી કરવામાં આવી છે જેથી કોઈપણ અનિચ્છનીય બનાવ અટકી શકે અને ગ્રામજનો નિર્ભય બનીનેજીવી શકે.
