મહારાષ્ટ્રના કોલ્હાપુર જિલ્લામાં આવેલી ખ્યાતનામ ગોકુલ મિલ્ક કોઓપરેટિવ યુનિયનના સંચાલન મંડળની ચૂંટણી બાદ રાજકીય ગરમાવો જોવા મળી રહ્યો છે. રાજ્ય સરકાર દ્વારા સોસાયટીમાં ચાર નવા ડાયરેક્ટરની નિમણૂક કરીને તેમને મતદાનનો અધિકાર આપવાના વિવાદિત નિર્ણય સામે હજારોની સંખ્યામાં સ્થાનિક પશુપાલકો અને નાગરિકો રસ્તા પર ઉતર્યા હતા. વિરોધ પ્રદર્શન કરનારા લોકોએ દશહરા ચોકથી જિલ્લા કલેક્ટર કાર્યાલય સુધી વિશાળ રેલી કાઢી હતી અને સરકાર વિરોધી સૂત્રોચ્ચાર કર્યા હતા. પ્રદર્શનકારીઓનું માનવું છે કે સરકારે લોકશાહીના ધોરણો વિરુદ્ધ જઈને સહકારી સંસ્થા પર પરાણે કબજો જમાવવાનો પ્રયાસ કર્યો છે.
આ વિવાદની પૃષ્ઠભૂમિમાં ગયેલી ચૂંટણીના પરિણામો છે, જેમાં કોંગ્રેસ સમર્થિત પેનલે ૨૫માંથી ૧૩ બેઠકો જીતીને બહુમતી મેળવી હતી, જ્યારે ભાજપની આગેવાની હેઠળની મહાયુતિના ફાળે ૧૨ બેઠકો આવી હતી. પરંતુ ચૂંટણી પરિણામો બાદ સરકારે કાયદાકીય નિયમોમાં ફેરફાર કરીને ચાર નવા ડાયરેક્ટર્સને મતદાનનો અધિકાર આપતા ભાજપ સમર્થિત બેઠકોની સંખ્યા ૧૨ વધીને ૧૬ થઈ ગઈ હતી. કોંગ્રેસ નેતા રાહુલ ગાંધી અને સતેજ પાટીલ સહિતના દિગ્ગજ નેતાઓએ આ પગલાને 'જનાદેશની ચોરી' ગણાવ્યું હતું. તેમનું આક્ષેપ છે કે ચૂંટણી હાર્યા બાદ પાછલી તારીખથી નિયમો બદલીને ૪,૦૦ રૂપિયા કરોડથી વધુ ટર્નઓવર ધરાવતી આ સહકારી ડેરીને હાઇજેક કરવાનો પ્રયાસ થઈ રહ્યો છે, જે મહારાષ્ટ્રના ખેડૂતો ક્યારેય સહન નહીં કરે.
બીજી બાજુ, મહારાષ્ટ્રના મુખ્યમંત્રી દેવેન્દ્ર ફડણવીસે આ તમામ વિરોધ અને આક્ષેપોને ફગાવી દીધા છે. તેમણે સ્પષ્ટતા કરી છે કે સરકાર દ્વારા લેવાયેલો આ નિર્ણય કોઈ પરોક્ષ કબજો જમાવવા માટે નહીં, પરંતુ ચેરમેનની ચૂંટણી અટકી પડવા પાછળના 'કોરમ' (પૂરતી હાજરી) ના સંકટને ઉકેલવા માટે લેવામાં આવ્યો છે. મુખ્યમંત્રીના જણાવ્યા અનુસાર, ચૂંટણી બાદ કોઈ પણ જૂથ પાસે ચેરમેનની ચૂંટણી માટે પૂરતું સંખ્યાબળ નહોતું અને જો વારંવાર બેઠકો રદ્દ થાય તો તમામ સત્તાઓ જિલ્લા નાયબ રજિસ્ટ્રાર પાસે જતી રહે છે. કાયદાકીય જટિલતાઓ અને કાયમી સ્તબ્ધતાને નિવારવા માટે જ આ કાયદાકીય જોગવાઈનો અમલ કરવામાં આવ્યો હોવાનું સરકારે જણાવ્યું છે.
